年尾樂壇頒獎禮將至，噚日喺旺角就舉行咗「四台聯頒音樂大獎」記者會，宣佈各電視台及電台負責頒發嘅獎項，舊年有份得四台聯頒獎項嘅側田同衞蘭都有出席。新城將會頒發「四台聯頒卓越大獎」、商台頒「四台聯頒大碟獎」、無綫負責頒「四台聯頒歌曲大獎」，港台就頒「四台聯頒傳媒大獎」。
記者會上側田同衞蘭喺表格上寫出四個獎嘅心水，佢兩個好謙虛冇寫自己名，衞蘭寫上英文拼音，被取笑就坦言自己唔識寫中文。對於老闆黎明（Leon）最近喺內地拍戲扮演梅蘭芳，反串扮虞姬嘅造型被彈，衞蘭話冇睇過啲相，但記者問衞蘭覺得黎明女人造型覺得點，佢話：「好驚呀！賴嘢喎！但係Leon咁靚仔，扮乜嘢都應該好睇嘅。」心直口快，相信黎明應該唔會介意嘅。
側田冇自信
另外，四個獎項中，側田嘅心水都冇寫自己嘅名，只係其中有份參與製作嘅古巨基唱片《Moments》，佢就睇好會攞「大碟獎」，側田話：「我向來冇乜信心，我嘅信心係比普通人低。當然我最想得大碟獎，覺得大碟勁過歌曲獎。同埋最理想喺出年半年做幕前，半年做幕後嘅工作，今年少咗作歌。」