何文田David噚日推介地鐵（066），一於當佢係地產股嚟睇。對於David嘅推介，亨達集團研究部董事黃敏碩認為：「地鐵係一隻防守性幾強嘅股票，近排港股跌咁多，佢嘅股價亦唔係跌得好深。」不過，David就唔滿意地鐵表現，「我喺合併前幾個月買入，嫌佢升得幾慢，去到高位又落番嚟，話晒地鐵係香港大地主，近排地產股升得咁勁，但地鐵硬係上唔到。」
𠵱家地鐵已經同九鐵合併咗，仲改咗名叫「香港鐵路」，聽日（6日）開始就會用新名喺聯交所正式買賣。David喺21.2蚊入咗地鐵，目標價30蚊，半年睇升四成二，止蝕價18蚊。地鐵噚日收市報26.1蚊，全日跌0.2%。
貪派息不如買REITs
黃敏碩認為，「早排地鐵被炒高，無非係兩鐵合併概念，攞多啲地，家陣消息已經消化，股價會先整固，嚟緊佢有新樓盤推出，有利明年收入，相信明年股價會由𠵱家水位再升15%，到30蚊，亦唔太難，時間可以換取你嘅期望。」
David問：「地鐵派息，應該收息好，定要碎股好？」黃敏碩話：「如果股票有增長潛力，梗係要股好，如果貪派息，不如買REITs（房產基金）好過啦！」
原來舊年開始投入「股海」嘅David，好鍾意地產股，佢的確揸住REITs，「有揸越秀房託（405）同埋泓富（808）。」黃敏碩話：「其實你唔需要重複買兩隻REITs，坦白講，泓富揸嘅物業同派息都唔吸引。」
孫柏文向佢推介領匯（823），至於黃敏碩就話：「REITs嘅股價升幅唔多，如果想收高息、有投資前景，又同地產有關，可以曲線買中銀香港（2388），佢家陣係物業按揭一哥，受惠地產市場上升，兼且收息唔錯，可以19.5蚊樓下買入，18.5蚊止蝕。」
冠捷（903）
高清概念冇得炒
西貢Peter推介冠捷科技（903），佢嘅建議喺4.6蚊買入，目標價睇6、7蚊，4蚊止蝕，揸3個月左右。
冠捷日前宣佈同台灣奇美電子合作嘅消息，刺激股價噚日最終升2.26%，收報4.98蚊。
不過，黃敏碩就話，兩間公司表面上雖然同樣都係做LCD顯示屏，但實際上一間係做panel，另一間就係做生產，協同效益未必好大喎。
Peter話冠捷係實幹型嘅公司，孫柏文反指冠捷缺少咗自家品牌，黃敏碩亦提醒Peter，冠捷面臨嘅競爭好激烈，profitmargin唔高，議價能力亦不足。
Peter於是問，對於日後嘅高清概念，冠捷最終究竟可唔可以受惠？孫柏文好抵死咁回應：「要記住，從來電腦屏幕嘅使用，最常用不外乎色情同運動兩大類，隨非察覺到有收費電視大事宣傳以上兩種節目，否則高清概念都唔會掂。」
言下之意，即係話高清概念都係冇得點樣炒啦！
長實（001）
放紙鳶睇165蚊
九龍塘楊小姐早前打過嚟推薦長實（001），當時佢建議135蚊左右入貨，唔聲唔聲原來長實已經到咗佢嘅目標價150蚊。噚日佢再打嚟，話一於放紙鳶，推高目標價到165蚊，睇多陣先放。呢排地產股又真係幾當旺，新地（016）日日創即市新高，亦係楊小姐繼續支持長實嘅主要原因。
楊小姐預計，「美國下星期一定減息㗎嘞，不過相信只會正正常常減0.25厘，反而香港可能會有驚喜，話唔埋減得比美國仲多。」黃敏碩就話，「香港應該會跟減，但追減就未必嘞。」
楊小姐𠵱家點計都係賺咗，連孫柏文同黃敏碩都讚佢揀長實係一個goodcall，但係黃敏碩都建議佢：「你不妨止賺咗先，如果減息後地產股都無咩反應，可以喺150蚊左右分段減持，就當攞番份聖誕禮物。」
-買入價-
楊小姐建議：$150 專家回應：—
-目標價-
楊小姐建議：$165 專家回應：—
-止蝕價-
楊小姐建議：$140 專家回應：將止蝕價改為止賺，定於$148至150水平
-時間-
楊小姐建議：1個月 專家回應：短期受惠一手樓市改善，股價可跑贏大市，可繼續持有
SOHO（410）
PE近百難再上
葵青廖先生噚日打嚟，話早幾日喺9.4蚊入咗一手SOHO中國（410），雖然股價之後回軟，但睇好佢只做高檔寫字樓及住宅項目，覺得受宏調影響較細，相信可以升到12蚊。
孫柏文就指，噚日SOHO中國收8.8蚊，市盈率（PE）都成96.8倍，要搵人願意以過百倍PE接貨，有一定難度。黃敏碩話，𠵱家內房股可以歸納為三類，首類屬於高風險民企，好似碧桂園（2007）、富力地產（2777），喺宏調下經營會困難啲；另一類就係同母公司關係密切，好似中國海外（688）、遠洋地產（3377），靠「阿媽」以低成本注入項目，宏調影響較細；最後一種，就係返內地發展、兼積極增加土儲嘅香港地產股。
黃敏碩同意，喺宏調之下，做高檔寫字樓同住宅嘅SOHO中國，影響相對較小，但係一旦考慮到佢PE較高，同埋市場太多內房股揀，佢做高檔項目又唔係其他人做唔到，未必有動力再上。
-買入價-
廖先生建議：$9.4 專家回應：—
-目標價-
廖先生建議：$12 專家回應：—
-止蝕價-
廖先生建議：$8 專家回應：—
-時間-
廖先生建議：半年至1年 專家回應：—
今日嘉賓：英皇證券研究部主管沈振盈
每日收市後4:30pm
想搵名家教路，請登入以下網址
http://appledaily.atnext.com/jp/finance登記
成功參與節目者，有機會獲贈禮品
歡迎Phonein28698262
＊以webcam參與節目者，可額外獲贈KFC$100現金券
