阿Paul黃貫中組band22年，今年5月搞騷仍然要自掏腰包；現在輪到Soler自資建band房成立自己的班底，錢，越搣越少，還得應付官司疲勞轟炸。明年三人還將聯同其他樂隊再度攜手搞「Let'sfight」round3。蝕本？不怕，只是怕沒得唱。
樂隊Soler04年出道，石破天驚，直踩紅館，在樂隊已死的香港樂壇，是奇迹。可是一宗合約糾紛，令Soler墮進煉獄。冇工開冇收入，還兵行險着搞公司做音樂。
今年5月，阿Paul獨力斥資百多萬搞「Let'sfight黃貫中演唱會」round2，Soler是表演嘉賓之一。早前孖仔推出新碟《x2》，其中一首歌《佢》，更是與阿Paul聯手炮製，向香港band友靈魂人物家駒致敬。
「我哋冇放棄」
大孖Julio說：「𠵱家開公司，有自己嘅band房，好多同事一齊好開心去做好音樂，我哋唔想淨係賣唱片唱歌。」一場官司，令Soler經濟陷困境，官司延至明年4月再審，生活仍然要過，歌更加要繼續唱。細孖Dino說：「𠵱家都係啱啱夠生存到，現實世界下下都講錢，冇錢一步都行唔到！」
難得經濟拮据時仍堅持音樂，阿Paul給了他們莫大支持。Julio說：「有次阿Paul講開打拳，佢話就算打到冇力、俾人打低，都要fung多幾下先至跌低。你諗吓我哋𠵱家經濟幾差，但都出到歌做騷，我哋冇放棄！」
為樂手做善事
冇放棄的還有阿Paul。今年五月他自資搞的「Let'sfight」演唱會round2，反應熱烈，但阿Paul說：「啲主流唱片公司好似唔係好支持樂隊咁，猛話『唔好搞咁多band啦』！」雖然無後台撐，但阿Paul仍然不死心：「遲啲會出番隻音樂會DVD，所有收益捐畀無國界醫生，想幫香港樂手做番件善事。」因為round2搞得有聲有色，故來年的round3吸引廣告商主動要求贊助，總算吐氣揚眉。
採訪：吳佩思
攝影：葉君海
