陳玉蓮闊別幕前14年，復出接拍無綫劇集《盜亦有道》，試造型時約法三章不拍性感、接吻及談情戲。劇集拍攝至今兩個多月快將煞科，其間劉松仁及導演按劇情提出破戒要求，蓮妹使出高招一一化解，最終松哥不禁大讚一句「你真係高人」。
劇集《盜亦有道》將近煞科，日前陳玉蓮與陳法拉到烏溪沙拍攝外景，劇情講述她們一對好友於沙灘漫步談心。久休復出的蓮妹與抱病在身的法拉在鏡頭前非常合拍，十多個鏡頭都一次過完成，鏡頭後就不停研究劇本，蓮妹不時與中文較差的法拉對稿，有講有笑異常投契。
嫌拍20集太短
開拍至今蓮妹並不覺得辛苦，可惜剛剛熱身投入工作，又將近煞科，她笑言20集太短，不過她堅稱沒有考慮會否再接劇集。蓮妹與劉松仁做對手戲，事前她一直覺得他很嚴肅，怎料開拍後完全改觀，她說：「記得有場戲講我哋拍拖，松哥事前問可唔可以拖手，我就笑一笑，同佢講拍拖唔一定要拖手㗎。拍完嗰場戲之後，松哥走埋嚟講鏡前唔拖，鏡後畀佢拖一次都得啩，之後佢就哈哈大笑走咗去。」另外，有次拍攝結婚戲，導演及全組人都要求蓮妹拍親吻鏡頭，但她指飾演的是儍大姐，當松哥錫過來便扮怕醜推開便可，最終導演收貨兼說：「咁都畀你過到骨。」松哥也不禁大讚蓮妹一句「你真係高人」。
對後輩法拉感覺，蓮妹大讚她聰明吸收能力強，每逢有新對白都很快背熟。法拉坦言首日與蓮妹開工感壓力，她說：「佢成日教我點講對白，喺佢同松哥身上學到好多嘢，可惜咁快拍完。」
合照來者不拒
提起法拉令蓮妹憶起鍾嘉欣，她說：「有次我喺公司餐廳食飯，鍾嘉欣突然走埋嚟話係我fans，問可唔可以一齊食飯，之後傾偈佢話唔識中文，𠵱家將啲中文字當公仔咁記，就記得好快。」
復出至今兩個月，不論途人或工作人員都把握機會與蓮妹合照，她也來者不拒，她笑說：「記得試造型嗰日劇組嘅人諗點叫我，因為覺得叫蓮妹好似唔尊重，其實我冇乜所謂，最後大家落實三種叫法係蓮妹姐姐、蓮姐姐同姑姑，大家都想叫得親切啲。」
採訪、攝影：馬建華
