數今年金融圈最大鑊嘅新聞，莫過於次按問題，咪以為呢單係美國嘢，你睇獅子銀行嘅股價就知。尤其上個月仲宣佈，將兩家SIV公司孭上身，獅子銀行股價即時大跌。華華當然好留意滙控（005）旗下嘅恒生銀行（011）有冇俾次按拖累。
曾遇巨大壓力
噚日同恒生副董事長兼行政總裁柯清輝傾開，華華問：「恒生有冇受次按影響？」柯大俠並唔似得渣打銀行大中華及日本區環球市場主管彭智樂（PatrickGillot）咁大聲話：「次按對集團零影響。」柯大俠嘅答案係──「影響一定有，因為信貸市場缺水，都會影響恒生揸住嘅票據價值。不過，集團喺次按『零exposure』。」意思係，恒生冇投資落次按嘅生意。
就正如當年科網熱咁，見到其他公司係咁易揼過網站出嚟，話涉足科網界，股價都嘭嘭聲升，你做上市公司主席拒絕搞網，睇吓壓力幾大吖嗱。前幾年，美國樓市大旺，明知做次按風險高，但有錢賺喎，梗做啦，當個個都做，連遠到喺祖國大陸嘅中國銀行（3988）都投資次按資產，恒生當然有壓力。
柯大俠話：「曾經有段時候壓力真係好大，當時我哋特登額外撥一筆備用資金畀Treasury部門。」華華以為，最怕上頭唔批錢啫，點知Treasury部門居然唔知點算，「Treasury部門阿頭當時搵咗啲投資銀行，想睇吓CDO（債務抵押證券）下面啲資產係乜嘢，但解唔明，咁唔明白嘅嘢最後就唔做。」
故事講到呢度，你明點解恒生喺次按零exposure，亦因為咁執番身彩。市場一向認為恒生保守，但華華覺得「保守」其實係「穩建」，值得學習㗎！
保守與進取
保守定穩健，其實見仁見智，唔少公司都喺錯誤中學到穩健嘅真諦。好似希慎興業（014）咁，喺地產界出名保守，都係因為曾經滄海啫。話說希慎喺96年樓市高峯期，從劉鑾雄嘅華置（127）手上，以36.4億銀摸頂買入中環娛樂行，點知97金融風暴，樓市下滑，搞到希慎孭下巨債。
希慎97年業績披露，欠債近百億，拖累股價由96年29.8蚊，急跌得番98年嘅4.975蚊，跌幅足足達八成三。05年希慎以27億出售娛樂行，賬面蝕9.4億銀。有咗教訓，希慎近年明顯冇咁進取，專注做銅鑼灣大業主。
保守相反就係進取，講到進取，華華諗起岳少林建岳。初擔麗新大旗嘅岳少，97年中以69億銀，向傅氏家族買入中環富麗華酒店，同樣面對金融風暴，拖累麗展（488）孭下近百億巨債，麗展99年業績勁蝕68億銀，仲要以18.8億銀賤賣65%富麗華權益，減輕負債。
衰在失信心
提到次按，柯清輝語帶雙關咁同華華講，恒生做生意一向穩健，其實當年恒生啲資產靚到不得了，完全係信心問題，先搞到要搵人救，滙豐識貨，所以入股。今時今日一樣，兩間SIV啲資產唔差嘅。言下之意係，滙豐識貨先至攬上身。
想當年，恒生由何善衡同林炳炎等人喺1933年創立，前身叫恒生銀號，60年正式改名做恒生銀行，以存款同資產嚟計，恒生已經成為全港最大嘅華資銀行，仲係滙豐嘅主要競爭對手。
雖然恒生作風穩建，但65年有家叫明德銀號最先出事，令到當時香港爆發存戶擠提，後尾蔓延到其他華資銀行，廣東信託、永隆、道亨同恒生相繼出事。當時恒生試過一日俾人提走8000萬銀，足足係存款總額嘅六分之一。最後，何善衡向滙豐求助，入股51%，解決銀行擠提風潮。就係咁何伯三十幾年嘅心血，拱手相讓，累到何伯喊足幾晚。
電郵：mailto:[email protected]