「嘩！嘩！嘩！雷丁聖誕新年大特賣！有冇人要列達同索尼？加埋都只不過係1,000萬鎊咋！好抵㗎！」以上嘅清貨口號，絕對係雷丁領隊郭甫嘅心聲。呢位教頭已經同主席米達捷斯基企埋同一陣線，將兩位想離隊嘅列達同索尼掛牌套現，實行1月轉會窗重開時大換血。
睇番雷丁今季已經有兩名主力離隊，薛維爾免費轉會車路士，薛琦鉉又賣咗去富咸，整體實力明顯大倒退。雷丁話就話排喺聯賽榜第14位，但其實只係距離降班區域多3分咁大把，郭甫𠵱家仲將英格蘭大小國腳索尼同列達掛牌，係咪對隊波咁有把握先？
執番一筆因住降班
郭甫就解釋佢至憎嗰啲唔想留隊嘅球員喺度嘥時間，既然索尼同列達唔同球會續約，郭甫寧願手起刀落，賣走兩件搞屎棍執番1,000萬鎊（約1.6億港元）好過。聽講主席米達捷斯基話舉腳支持郭甫所有嘅決定，仲話使幾多錢買人都冇問題，開聲得喇喎，睇嚟索尼同列達1月嗰陣走人機會好大。
我求大俠覺得，曾經係英格蘭大國腳左閘嘅索尼，點都值幾百萬鎊嘅，所以一旦將佢掛牌，都唔愁冇買家開價。話口未完，韋斯咸同紐卡素都對呢位26歲守將好有興趣。列達雖則係英格蘭U21小國腳，但係講質素真係……不過你吹得佢脹，慘得過新特蘭同樸茨茅夫有意收購，郭甫仲唔嗱嗱聲開香檳！
相信雷丁想賣走兩件名牌唔難，驚就驚在佢哋1月轉會窗重開嗰陣有錢冇掟使咋！因為冇咗咁多件主力成績大倒退，邊有球員肯去一支有降班「潛力」嘅球隊喎！