這份稿，許多意料之外！提議要報道一套高調的同性戀音樂劇《異型金剛》，挑戰OneFineDay的Open尺度，結果似乎自己想太多，編輯們神態自若點頭；《異》劇9月初演，康文署力撐宣傳，同性戀劇吸晒直攣Couple，未開售已預訂6成，受歡迎到今月再演，是第2個意外；找來編、導、演的異人實現劇場，睇海報佢哋衣着華麗騎呢，訪問時卻正經到敲你心門問你心中有無愛？原來《異》劇焦點一直放在愛，Homo只是包裹在外，或許康文署及編輯們早已意料之內，只有我在井底甚為意外！
記者：馮冠芝
攝影：陳陶鈞
兒童不宜兒童劇
只看海報，我以為《異》是一場彩虹笑劇，看畢只是嘻哈一場、多了解一點同性戀，但「異」人最愛給予意外，此劇亦然。「《異》用插敍帶出3條主線，第1條係做一套出名的卡通電視劇，妖精異型要找永恒，正義金剛竭力阻撓，無論異型與金剛，在過程中，都會失去寶貴的東西！」異型、金剛有晒象徵意義，前者攣後者直，講「絕對正義」講異己講生死，這套「卡通」，兒童不宜。「因為我哋鍾意做開心嘢，兒童劇其實笑人亦笑己，可以好Dark！」曾在亞視做兒童節目的林澤群如斯說，我意外太多，不差在接受多幾個。總之，異型金剛華衣背後，第2條線說睇「卡通」的觀眾，現實中的等愛、癡愛、尋愛有血有肉戀愛史，第3條線講愛的反面唔係恨，係孤獨！絕對笑笑吓用感動陰你一下，如另一成員黃龍斌話：「觀眾入場準備坐過山車啦！」
愛情過山車上車唔使問阿Gay
過山車係要坐，但點解唔坐「一擲千金」那架，偏要上彩虹過山車先？異人自信話，因為此劇同性戀只是一個符號，上車唔係為咗問：「你是否Gay？」而係問：「你有愛嗎？」但世上的愛千萬種，為何偏要選彩虹？「因為我哋曳！其實我哋之前的舞台劇亦愛用符號象徵，但今次我哋想玩激啲，決定用同性的愛去問：佢哋啲愛係咪就唔等於普通人的愛？」的確，這年代連無綫的《通天幹探》都可以將Tobby與莊文希的：「床上照」播完又播。故此我問異人高調玩同性戀敏感題材怕不怕被批評時，難怪林澤群反而驚訝問：「點解會被批評？我哋套劇，鬧直又鬧攣！同性戀係存在，無得避，觀眾入場，我哋無迫你接受，但要尊重，因為攣定直，都係人。」講到尾，無話反對或贊成，站在哪一邊，代表了標籤，「我哋希望有日GayMusical不用標明是『Gay』，正如我們不會說：『異性戀音樂劇《油脂》』一樣！」
請給我分手的理由
妖過草蜢演唱會，男男激吻、扮裝皇后、歌舞連場……華衣背後，簡單說出戀愛不分你我他。所以獲得康文署畀錢力撐，在地鐵落足兩個星期廣告，9月在牛池灣初演爆滿，12月跳到壽臣開show，現今亦只剩少量門券。於我，咁激的同性音樂劇男女皆愛，是場意外，我問異人會否3、4度公演，他們卻忽然說散聚！黃龍斌會前往外國進修，林澤群就閉關進修，散完再聚，竟如他們之前的舞台劇《二人聚．2人散》。異型金剛是休息站，將來此2人，必再予觀眾更多意外、無分異同的愛。
後記
很膚淺地，訪問期間我不禁想，2個男人做Gay劇，你們是否……問唔出口，婉轉換問題：「劇中你們有親密接觸，會否尷尬？」異人說當演員投入角色後，不會尷尬。我聽着，卻見2人拍照時「四目交投」後忍俊不禁，是以笑掩直男尷尬，還是笑中藏曖昧，觀眾自己判斷，我猜不出。
異人實現劇場小資料
「異人實現劇場」由資深舞台劇黃龍斌及林澤群於05年成立，同年推出《二人前．2人後》、06年推出《二人聚．2人散》兩套系列性舞台劇。前劇用貓與蟬，《異》劇玩攣直，難保下一次會來套印度Bollywood。
《異型金剛》
主演：黃龍斌、林澤群
地點：香港藝術中心壽臣劇院
日期：
6-9/12/2007（晚上8點場）
8-9/12/2007（下午3點場）
票價：$250/$200/$180
票務查詢：27349009