香港股神、恒基地產（012）主席李兆基今年私人炒股賺大錢，佢嘅投資旗艦兆基財經規模，由04年底500億銀，𠵱家升到超過2000億銀，3年間升3倍。佢曾經講過，賺多啲就會捐多啲錢做慈善活動。對三唔識七嘅貧苦大眾都咁慷慨，對於幫自己嘅員工，「順得人」李四叔梗唔會孤寒。
噚日佢喺恒地股東會後向員工報喜，預告明年平均加薪5%，高過市場平均4%；另外仲有雙糧，個別工作表現出色嘅員工，更可以獲發半年人工做花紅，呢啲老闆跟得過呀！
四叔之前捐咗5億銀畀香港大學，部份用嚟擴建校園，其中一幢大樓仲用左右手林高演嘅名命名，叫林高演學堂。林高演當時都話，邊有老闆捐錢，用夥計個名去命名，所以非常感動。可見四叔實在深得人心，咁嘅老闆，梗係有員工盡心同佢博啦！