以前一家大細燒嘢食，要煩嘅係醃食物預份量、買叉帶炭又霸爐，去到燒烤場都攰到有心無力。𠵱家不少地方都會有爐和食物提供，煩嘅係場地選擇太多。鍾意度假feel嘅，可搭車去西貢蠔涌，泰式茅屋歐陸茶座共冶一爐。愛運動嘅家庭，可以扯轉入屯門，扮上等人在草皮打golf玩ballgame。所以話𠵱家燒嘢食，兩手fingfing就得喇。
記者︰劉昱蘭
攝影︰梁細權
Model︰Cherry、Gigi、Kathy、Jason、筠筠、澧澧、梁生、梁太
前面打波後面密密食
好動嘅家庭可以試吓邊燒嘢食邊打golf，屯門高球港係唔錯選擇，嗰度收費平，一家四口平均每人消費$80，就可包1條球道（1小時）同BBQ，而且個高球場唔算細，全場有60條長250碼嘅球道，每個發球位仲好闊落，前面係打波嘅球道，後面則放有可供燒嘢食嘅燒烤爐，爽！場內仲有排球、籃球、羽毛球畀你租，打完golf後唔怕無着落，如果3、4家親戚聚會，仲有麻雀耍樂夠熱鬧。
高球港
地址︰屯門龍門路第46區望后石（內河碼頭對面）
電話︰29920399
交通︰新屯門中心乘的士前往約$20
20,000呎大草原
金喜花園好啱靜態家庭，在西貢蠔涌路口上2號小巴，3、4分鐘後喺大窩村落車，見到成豐片場路牌轉入去，行多8分鐘斜坡路入閘口，窄路轉入花園後便會見到闊落大草原，連原本行到腳仔軟的小朋友，一見到藍天白雲、翠綠草地就失控周圍跑，始終大自然先係小朋友嘅樂土。
歐陸加亞熱帶情調
金喜夠靜，因只做包場客，而且位處僻靜，暫遠煩囂。草地上一邊係歐陸式花園設計，雪白通花鐵製桌椅，花圃旁還置有鞦韆。小池石橋嘅另一邊，就係亞熱帶風情嘅茅屋酒吧，入夜後又係另一種氣氛，黃色的小燈炮全亮起，加埋啱mood嘅R&B音樂，終於都有個地方可以摸吓杯底，又可以睇實班小嘩鬼。
新鮮生猛海鮮
一場去到西貢，除咗指定動作燒腸仔牛丸加雞翼，點可以唔燒海鮮，當你見到隻蝦仲郁動緊，就知自己品嚐緊西貢最新鮮貨色。呢度嘅肉扒都醃得有心思，薑汁雞扒香口惹味，煨溏心番薯，溏心流晒出嚟入口即溶，包保小朋友食到舔舔脷。
金喜花園
地址：西貢蠔涌路DD229（成豐片場直入）
電話：22430303/98605986
註︰請於一星期前預訂
健康燒烤小貼士
BBQ被定為唔健康又熱氣嘅活動，其實都係睇你是否有節制食得其法。註冊營養師陳國賓話，小朋友其實每日只需要食兩個手板仔嘅肉類，所以1塊扒2隻雞翼加少少腸仔同肉丸，就已經爆晒quota，如果燒嘢食時食得太多，晚餐就要食得清淡啲，同謹記以下5個健康tips︰
1.唔好太晏先開始BBQ，太肚餓時會食好多易熟嘅腸仔、肉丸等加工肉類落肚，吸收過多飽和脂肪。
2.可燒多幾隻雞翼或海鮮代替腸仔等加工肉類。
3.現成買醃製後嘅肉會無咁健康，醃肉時會用好多油同醬汁，自己醃就可用檸檬汁、香茅等簡單調味料。
4.點都要燒啲蔬菜平衡吓，咪做食肉獸，菠蘿、車厘茄、草菇、蘑菇等最方便。
5.用高纖包夾住肉一併食，無咁油膩之餘，有肉又有五穀類，可平衡各營養吸收比例。
營養師陳國賓
仲有個燒雞翼小秘技，就係將雞中翼兩條骨剪開拮住嚟燒，易熟啲冇咁易燒燶，減少食咗致癌物落肚。
