前晚《AllThingsD.com》爆料話，超人李嘉誠掟6000萬美金入股社交網站Facebook，仲話係因為一個Facebook投資者，介紹畀超人知己旋旋周凱旋而促成呢單deal。咁當然係冇人會證實超人有冇買，同埋用邊個名義買，但由於個報道提到，超人入股可以幫旋旋做莊嘅TOM（2383）成為Facebook大陸夥伴，所以，TOM仔股價噚日就受惠呢個傳聞勁升，開市6毫1，最高見過9毫3，升成52%，收市就回軟跌番落7毫4，但同上日比都升成23.33%。
咁TOM仔循例都要出番張通告，澄清吓話，唔明股價同成交量點解上升。不過，至重要嗰點係：「本公司並沒有對Facebook作出任何投資，本公司不時尋求投資機會及其他商業聯盟。」潛台詞咪即係，「大股東搞咩我哋唔知㗎，總之唔係打呢邊牌頭囉！」