又到年尾，除咗買衫換季，屋企嘅傢俬都係時候變一變。不過沒理由全部買過新嘅，好似一些用舊了的木器，其實只要稍一翻新，就可以變成新傢俬，而且要甚麼顏色、圖案都由你話事，不只切合環保潮流，做個精明用家，仲可以平價幫屋企換個新形象。
記者：劉明慧
攝影：林栢鈞、陳盛臣、梁細權
黏貼變新裝
價錢：約$174
製作時間：約90分鐘
如果係懶人一族，但又想給人型格一面，可嘗試用報紙或雜誌，以黏貼方法貼在木傢俬上進行大翻新。
材料：T尺、砂紙、鉛筆、排筆、噴膠、水性光油、雜誌
Steps
1.用砂紙把木面磨滑，再以T尺同鉛筆畫好間線。
2.在要黏貼的地方噴上噴膠。
3.隨意將雜誌剪成大小不一嘅正方形，貼上木面，直至將整件木器貼好。
4.約10分鐘待雜誌亁透黐實，就可在表面塗一層水性光油作保護。約30-45分鐘待光油亁透，塗上第二層光油，約塗3-4層便成。
小秘技
噴膠有分70、75至90度，90度黏貼度最高，而70同75就可以貼完之後即時撕出，唔怕貼錯位置。
彩繪蓋污迹
小朋友最鍾意喺傢俬上面畫公仔，尤其係木呢類極易上色嘅傢俬，要掩蓋呢類人為筆迹，解決辦法係教佢哋用塑膠彩畫彩繪，除可以享受親子樂，仲可以粉飾木器，一舉兩得。
雙色層圖案
價錢：約$40
製作時間：約40分鐘
材料：油掃、鉛筆、擦膠、白膠布、塑膠彩、平頭畫筆、尖頭畫筆
Steps
1.先用T尺及鉛筆隨意畫出界線，用塑膠彩勾出邊位線，再油上深淺不同的藍色。
2.上好底色後，可以用鉛筆輕力畫出多個大細不同的圓圈，亦可畫上不規則圖案。
3.以細號畫筆把上下弧位勾出，再填滿圓形。
小秘技
怕畫出界，可先貼上白膠布，油上顏色後撕走白膠布。另外，唔想用塑膠彩，亦可改用乳膠漆，但要再油一層光油保護。
火燄圖案
Steps
1.先用鉛筆畫出不同曲線，然後由淺色開始，用黃色順着同一方向油一半。
2.再用紅色油從另一方向油向黃色，兩色接位要做成混色效果。
3.用尖頭筆以黑色勾出幼線及填滿顏色，用細號尖頭筆細執瑕疵地方。
小秘技
加色時要在底色未亁前，輕力由上而下拖去，盡量一筆過，避免顏色黏在一起。
索色保留木紋
價錢：約$140
製作時間：約120分鐘
想將木傢俬換色，其實可以做一個叫索色的工序，方法係用一支三十零蚊嘅色晶，幫木器換色，此做法比一般油漆更光亮，還可以保留木紋，就算新手都一樣無問題。
材料：砂紙、砂磚、棉布、排掃、威士、色晶、環保水性油漆（水性力架）
Steps
1.先用砂紙包住砂磚，順住木紋方向，將表面打磨平滑，再用棉花抹走表面木屑。
2.用棉布包住威士，再揑成圓球狀，蘸上色晶。
3.把色晶塗上木後，用亁淨棉布抹走表面水迹同令顏色均勻。約10-20分鐘待亁後，上一層保護油漆。
4.以1:3比例，將清水加入水性油漆，用棒攪1分鐘。以排掃蘸上油漆，掃上木板表面，待30分鐘後再上第二層。
小秘技
想色調淡點，可加清水混和色晶。如果只想令木色更光亮，而非改色，可把木器表面力架磨走，將色晶混和油漆，直接油上木器表面。色晶價錢由$35-$145不等。
專家話……
三行師傅石生：「其實索色一啲都唔難，家庭主婦都做到，而且色晶唔會染到成手係，用水就可以洗得甩。」
