專做散貨船嘅太平洋航運（2343）認真厲害，繼舊年搵咗國泰航空（293）前主席唐寶麟做獨立非執行董事、明年做埋主席，最近竟然請到美資大行摩根士丹利亞洲前主席文禮信（圖），擔任獨立非執行董事。
59歲嘅文禮信原本係怡和大班，2000年起擔任大摩亞洲主席，今年4月退休，估唔到休息大半年就有新動作。
話明係獨立非執董，文禮信當然唔會管理太航嘅日常業務，但係以文禮信嘅投資銀行背景同人脈關係，對太航產生嘅明星效應都幾大。
奇就奇在，太航04年喺香港上市時，保薦人係大摩對手高盛，𠵱家搵文禮信做非執董，第時啲融資生意唔知會唔會過晒去大摩度呢？
太航本身都係隻神奇股，04年中上市，招股價只係2.5元，今年10月底最高見18.4銀，噚日收14.22蚊。