噚日，孫柏文睇電視見到一班非常勤力嘅記者，企喺中環政府合署，等特首曾蔭權返工。曾特首到達嗰刻，記者即時問特首點睇陳方安生喺立法會補選嘅勝利。唔使問亞貴都知陳太贏係因為選民對民主嘅訴求非常堅定，唔通係因競選工程掂咩？
當然，曾特首作為一個IQ好高嘅人，唔知選民對民主嘅訴求咩？不過因為佢始終係行政長官，所以冇直接答啲記者，最後用例子答。
預視政制劇變
大家可能會問：「噚日特首連聲都冇發過，有答咩？」有。如果大家同我一樣，有睇電視，應該知特首走過啲記者之後，上樓梯時仆親。大家都知，對上一次香港人喺電視見到有領導人行樓梯時仆親，就係82年戴卓爾夫人去北京，被小平同志通知香港將被解放嗰次。
即係領導人行樓梯時仆親，就等於該位領導人知道，香港政治制度將會出現無可抵擋嘅劇變。戴卓爾夫人仆親，香港被解放。曾蔭權仆親，香港有普選？
不過，孫柏文今日想公開鼓勵一位喺禮拜日落選嘅候選人。佢就係凌尉雲。
凌尉雲喺佢政綱當中，話明為咗弱勢社群保持有入職機會，堅決反對最低工資。孫柏文有機會問凌尉雲：「自由黨都反對最低工資，點解唔直接支持自由黨算？」凌尉雲話自由黨反對最低工資，開口埋口都係為咗商家。根本冇用心機去解釋畀市民知，最低工資會害咗啲弱勢社群。我就係憑佢呢句覺得凌尉雲好。
落選希望仍在
仲有，喺質問葉太對23條立法嘅立場，問心邊個問葉太比凌尉雲好？淨係：「究竟乜嘢先至算係『共識』？」已經大快人心。
最後，我曾經直接問凌尉雲：「乜你好支持強積金？如果你對自由市場精神堅挺，一定希望取消強積金。點解𠵱家只係要求「改良」強積金？」佢話：「一席，十個月，好難推翻強積金。只能希望『改良』。不過，希望到08年立法會選舉，將會有60個支持取消強積金嘅候選人爭60席。」孫柏文都係咁希望，仲希望60個候選人當中，會有凌尉雲。不要氣餒，再接再厲！
金手指網誌： http://phatdat.blogspot.com