首先恭喜卡卡實至名歸奪歐足先生，改制後，呢個獎等同世足先生，如果我隊波都擁有一個呢啲球員，你話幾好呢？希望嗰個香港人做到我老闆啦！
人不可以貌相，國內記者見我笨笨實實，生死戰鬥意大利，又講「7的疑惑」，乜嘢77頂「喼」帽、格流7場連敗紀錄、國家隊平均年齡27歲呀，直頭想邪死我先開心；係，我係11月27日教伯明翰，咁代表咩呢，代表佢哋係井底之蛙囉！
格流於我麾下，號令天下之後，我話過唔再教國內蚊型會，就算我走嗰陣係四大皆空，仍然深信皇帝女唔憂嫁。哈哈，踎咗半年終於等到禾達史密夫走頭，我知足總實會打畀我，事關今日除咗我，就僅有師傅費格遜有資格教國家隊。
有今日唔係符碌撞棍
一般人係憎人富貴厭人貧，我每場帶隊前同師傅商量，人哋就話靠「父」蔭；做過禾達史密夫助手，唔代表就此扶搖直上；蘇格蘭去唔到歐國盃係咪唔抵？你睇睇連羅馬尼亞及土耳其都有份，就知世事如棋，運氣係緊要過人氣。
我曾經教波教到降班，帶格流試過「打吡」7連敗，當時出街由街頭俾人笑到街尾，呢啲辛酸有幾多人知？食髓知味，我帶格流同國家隊喜歡順勢而上，冇錯喎，邊個話新官上任等於人事革命，沿用舊有班底何錯之有？因為個陣已經係最好，試問最好又點可以變得「再好」呢？
由格流到蘇格蘭國家隊，再到伯明翰並唔係符碌撞棍。嗱，我第一場帶隊就爆大冷贏波，仲要贏熱刺！今次人工升3倍，並唔係浪得虛名嘅！
文：阿呢斯奧