香港好快就進入高清廣播時代，之不過鄰近嘅韓國好早就講緊高清。高清令畫面變得細緻，但同時又變成明星嘅死穴，事關觀眾可以睇清楚明星嘅真面目。最近就有網友將全度妍、金泰希同林秀晶等女星嘅大頭高清照捕捉起嚟，邊個後生邊個靚女真係一清二楚。
金泰希似白玉
網站列舉咗影后全度妍同韓劇《壞愛情》嘅李瑤媛為高清下嘅失敗者。34歲全度妍雖然喺影壇好掂，可惜畀大家見到佢對眼同個鼻附近嘅皺紋，只可以嘆句歲月不留人。至於李瑤媛就皮膚粗糙，可能係近日拍劇太忙都未定。
有彈當然有讚，向來有童顏美女之稱嘅林秀晶，皮膚同BB一樣咁滑；金亞中嘅皮膚就好有彈性，至於金泰希就更加獲讚好似塊白玉咁，毫無瑕疵。有網友指兩三年前見過好多30出頭嘅韓星，已經有晒雀斑同皺紋，老態盡現。但近期見佢哋啲皮膚好咗唔少，懷疑佢哋因為驚高清而走去打肉毒桿菌針。雖然嗰位網友冇開名係邊個，但證明高清嘅出現，令好多女星非常緊張。
版主：網盜王尊尼Deep
本欄逢周一至五刊出
網址： http://kr.news.yahoo.com/service/news/shellview.htm?articleid=20071129151100254d9
網址： http://tvzonebbs4.media.daum.net/griffin/do/star_photo/read?bbsId=A000010&articleId=179592