一直以嚟，香港零售股王（華華係以市值計）思捷環球（330），無論盈利、股價、企業透明度同處理傳媒採訪等事項，從來冇令華華失望過，但勢估唔到噚日舉行股東周年大會後，思捷管理層居然唔見傳媒，仲係原本話見，之後突然唔見嗰隻。
華華大大話話去過近10次思捷股東會，由佢股價仲係6蚊雞，做到家吓升級變紅底股，過咗百一蚊；由前主席邢李㷧高呼香港冇人識睇時裝股，到𠵱家冇一家證券行敢唔cover思捷。每次思捷管理層都會同傳媒詳談業務近況、前景，特別係邢生米高，有時仲會特登留低講多兩嘴㖭。
冇王管的日子
噚日個股東會就完全唔同晒，股東會一完，思捷有關方面叫晒電台入去set機，但係另一邊廂，集團主席高漢思同埋副主席潘祖明，就前後腳咁走咗，之後仲有位小姐走嚟打完場，話不如下次再問啦！真係咁都得？
華華記得，舊年係米高邢最後一年以主席身份出席思捷股東會，雖然佢舊年都係完咗股東會就鬆人，但一班管理層仲留番喺度答記者問題。唔通真係人去茶涼，冇王管嘅日子，一班高層就唔使理傳媒？定係學前主席開完股東會鬆人呢一招。
其實近年好多上市公司，為咗增加企業透明度，都唔介意喺股東會後同記者吹吹水，講吓近況同前景。華華衷心希望，下次思捷股東會，可以再同管理層坐低慢慢傾。
兩高層同日沽貨袋錢
思捷高層唔止有樣學樣，學邢李㷧咁股東會後即鬆人，仲學埋佢減持股份。兩位高層包括高漢思同潘祖明，同喺上月底減持思捷股份。根據港交所資料顯示，喺上個月28號，高漢思以每股平均價114.2蚊，喺市場上沽出200萬股，套現逾2.2億銀，佢家陣手上嘅思捷股份減咗近半，持股量由0.37%降至0.21%。至於，潘祖明亦喺同一日，以同樣每股平均114.2銀，沽出100萬股，套現超過1.1億銀，持股量降至0.27%。未知呢次高層同時減持股份，會唔會影響股民對佢哋集團嘅信心呢？
米高邢沽貨例升
自思捷環球成為恒生指數成份股以後，前主席邢李㷧就不斷減持手上嘅思捷股票，02年到𠵱家，一共沽咗8次貨，每次都上百萬甚至千萬股，持股量由原來42.2%，降到家吓8.7%。最有趣嘅係，米高邢越沽，思捷股價就越升，其他上市公司主席真係唔恨得咁多。
思捷股份由02年尾嘅14.5元，一直向上躍升，噚日收市報119元，升幅足足有7倍。至於，米高邢8次沽貨套現，袋咗超過172億銀，𠵱家米高邢手上仲持有過億股思捷，絕對可以善價而沽！
電郵：mailto:[email protected]
