評馬人余伯樂好鍾意唱粵曲，佢位小千金係音樂神童，在學玩彈鋼琴，唱粵曲，才藝嚇人一跳。今年年初在新光戲院余伯樂與余千金合唱一曲，為傷健策騎協會（RDA）籌款，余千金技驚四座，林煥光聽到唔願走。原來林煥光係粵劇迷，十零歲時就寧願唔食麵包，儲埋啲錢嚟買飛睇任劍輝白雪仙，睇《琵琶記》睇到成泡眼淚。林兄與余兄一齊講粵曲之時，左丁山只有聽的份兒，冇法子插嘴，余伯樂話當今粵劇界人士之中，佢最佩服梁漢威，話梁漢威不止唱得，對不同曲調嘅來龍去脈與版本及改編，亦瞭如指掌。
啱嘞，呢晚在陸羽二樓，杜國威講佢寫下第一齣「現代戲曲音樂劇」《珍珠衫》，由胡美儀、梁漢威、李龍、郭鳳女四人掛頭牌演出，今個周末在葵青劇院，十二月廿一日起在沙田大會堂演奏廳演出。左丁山問：「阿威哥，你未寫過粵劇噃，點識寫曲呀？」杜國威騎騎笑：「有梁漢威、李龍睇住，唔識都變識啦，小曲、梆黃等等，有漢威哥就掂晒。」我哋成班人立即話唔識甚麼叫做梆黃，要求兩位威哥即席示範。正是徇眾要求，杜國威唯有行過另外一張枱，攞張陸羽點心紙，在背面寫下幾句，請梁漢威、李龍示範梆黃唱法。古有曹植七步成詩，今有杜國威一分鐘填詞，詞曰：「信是有良朋，春天（按：即春天製作）得成正果，各方友好蒞臨，珍珠衫光輝四射。」梁李兩位企起身，唔使準備，立即清唱，嘩，幾簡單嘅曲詞，出自梁李之口，竟然動聽動人，真係唔講得笑。
高志森話喺香港演粵劇，困難不少，佢哋諗咗好耐，卒之度到條橋，就係上廣州配樂，現場以電腦播放，包保觀眾耳目一新，而且為咗配合香港人時間，齣劇連休息時間，不超過三小時。故事又如何呢？杜國威話原屬《喻世明言》內之民間故事，有幾百年歷史，原著只得三幾頁紙，歷代無人敢改編搬上舞台，皆因故事主角係女人，竟然係一女愛上二男，在古代道德派眼中，主題十分不正確，若非當今女權當道，人權至上，佢都唔敢以現代手法改編也。故事講完，黎文卓話直情係荷李活電影《珍珠港》，趙來發又話十足一本十九世紀英文小說。杜國威答曰：「鬼佬抄我哋老祖宗小說！」