恒隆地產（101）噚日嚟咗張通告，原來佢哋位女執董伍綺琴，由12月1號起唔做。做得恒隆唯一一位女執董，當然非泛泛之輩，伍綺琴過檔恒隆地產前，係港交所上市科高級總監，03年過檔恒隆地產，最初做助理董事，兩年後就升到離職前呢個位。
恒隆地產嘅執行董事唔多，家陣計埋陳啓宗，只有4位男士，伍綺琴係恒隆地產四十幾年嚟，第一個女執董，所以都咪話唔巴閉，佢升職後，恒隆地產唔夠董事房，吳士元（Terry）就讓咗間房畀佢，不過Terry冇屈就，仲搬上兩層新間出嚟嘅董事房，即係權力核心、主席陳啓宗間房樓下嗰層。
至於伍綺琴之前喺港交所亦好有地位，不過03年周文耀入主港交所後即大力整頓，自然有一輪地震，伍綺琴就喺嗰陣請辭。咁今次又為乜唔do？通告話佢想專心發展其他事業喎。