近年銀行從業員做義工越嚟越多花臣，剪草捕魚已經唔新鮮，恒生（011）最近就幫雲南省嘅村民同啲豬，興建200個沼氣廁所，起嚟做乜？原來係將人同豬嘅糞便變成沼氣，再轉化為能源，取代燒柴嚟煮食同照明，咁每年就可以斬少500噸柴、大約20英畝樹林，亦都令到二氧化碳嘅排放量每年減少2500噸。
恒生呢次出錢又出力，先贊助長春社呢個為中國農村再造能源活動，跟住搵埋員工去做義工，呢班義工一啲都唔易做，出發前要喺香港建造業訓練局接受砌磚同髹漆訓練。然後山長水遠去到雲南，為村民起廁所，仲要聽實工程師講解地下沼氣池嘅運作，做得認真又專業。
恒生一姐薛關燕萍話，呢啲環保廁所除咗可以保育環境，仲可以等啲農民慳番啲斬柴嘅精力同時間，改善生計。呢項計劃亦有助減低因森林受破壞而造成嘅水土流失，沼肥又可以做天然肥料替代化肥，一舉三得。