港島區立法會議席補選塵埃落定，經一番劇烈競逐，泛民主派全力支持嘅陳方安生得175,874票，贏咗民建聯自由黨總動員力撐嘅得137,550票嘅葉劉淑儀，其他六位候選人總共得7,291票。以得票比率計，陳太得54.84%，葉太得42.89%，其他人有2.27%。
好嘞，陳太算唔算大勝？有學者話，如果陳太得票超過55%，葉太得票少過四成，陳太就算大勝。𠵱家差少少，陳太贏咗就係贏，做成立法會議員，毋須介懷是否大勝咯，葉太係一個好強勁嘅對手，泛民派如果用甘乃威或者何秀蘭出選，必輸無疑，上次（二○○○年）余若薇以新人身份上陣，參加補選，都係得十萬零八千票咋。
葉太力拼之下，搵埋自由黨/民建聯啲大佬上陣,再加埋蘇絲黃以及股市紅人陸東上街支持，仍然飲恨，明年捲土再來嘅話，應該贏梗啦，只係驚到時葉劉嘅票太多，對民建聯有不利影響而已。股票分析師以前好少公開為立法會候選人站台，今年打破傳統，首先有曾淵滄為葉劉站台，讚佢係優質股，繼有陸東於選舉日上街為葉劉拉票，令不少股民聯想到，識時務者為俊傑，他日陸東發表有關於港股直通車之評論，可信性大大提高。你知啦，李公子投完票之後，對記者講咗一句：「經濟雖然好好，希望市民仍然出嚟投票。」呢句話意義深長，乃有智慧之言，好多選民就因為經濟好好，股市暢旺，搵錢要緊，管他甚麼公民責任，投下一票吖。陸東係今天股市大好之象徵，好多選民見到陸東，只會想起股市，諗唔起去投票，從此角度睇，陸東上街撐葉劉，可能係在不適當時候在不適當地方出現噃。
以前啲選舉戰甚少涉及賓架，呢勻就唔同，葉劉有唔少財經界人士支持，上星期四、五電郵滿天飛，一個傳一個，就係推介葉劉為人認真，勤奮有擔當，呼籲各賓架投葉劉一票。電郵卒之傳到嚟左丁山度，不過左丁山唔係港島區選民呢。有人睇完即刻依樣畫葫蘆，發出連鎖電郵，呼籲收件者投陳太一票。所以話呢，有直接選舉投票，興趣係高啲嘅。