呢排出街撞口撞臉都係啲大肚婆，連公司同事暉暉個肚都一日大過一日，成日露出幸福嘅笑容。小妹就婚都結唔成，真係有啲觸景傷情。噚日暉暉佢挺住個肚問小妹，話好想搵陪月服務，但係唔識點揀。原本唔想睬佢，見一場姊妹，同佢問吓消委會啲老友。
老友話，陪月服務分兩大部份，包括預備入院後嘅膳食、代煲薑醋等嘅產前服務，同埋照顧初生BB、產婦產後護理嘅產後服務。講到人工大多以月計，工作時間分半日、全日或留宿，每周工作五至六天，人工由8,000蚊到14,000蚊，留宿最貴要20,000。如果經私營中介公司搵陪月員，要畀首月人工嘅15%至20%做介紹費，搵指定嘅人要多畀500或1,000蚊嘅附加費，經社會福利機構就唔使。
嘩，咁條數都好襟計噃。老友話，𠵱家陪月員好吃香，肯畀錢都未必請到心儀嘅，仲要最少喺預產期前三個月搵定，有名嘅仲要六個月㖭。
佢話，雖然難搵都唔好亂揀，第一要搵有口碑嘅服務公司，第二要睇清陪月員嘅履歷；面試當然唔少得，大家要講清楚工作重點，可以嘅話叫陪月員以試工形式提供服務，滿意先簽約。
逢周一至周四刊出