台灣人氣偶像周渝民（仔仔）前晚喺觀塘apm舉行「聖誕樂聚簽唱會」，宣傳新碟《我不是F4》，吸引過千歌迷同市民圍觀，半百傳媒採訪，場面相當墟冚。大會派發1,000個籌，有歌迷喺前一晚已經到場排隊。
成日問點解
仔仔主持商場聖誕亮燈儀式同獻唱後，就為歌迷簽名，但因唔少歌迷簽完又再排隊，所以大會喺晚上10點就暫停派籌，歌迷秩序良好。
仔仔喺台上俾主持問點解新碟叫《我不是F4》，佢調皮咁以廣東話話：「點解呢？點解呢？點解呢？」歌迷聽到偶像講廣東話即歡呼大叫，後來佢以普通話解釋：「我不想大家還記住F4，這樣距離太遙遠，我已經成長了。」問到新碟花幾多時間製作，仔仔又猛話：「點解呢？點解問點解？」搞到歌迷又興奮大叫，佢突然又話：「山頂嘅朋友你哋好。」佢想講「我愛你」但講得唔正變咗「我un你」，笑到人肚攣，不過歌迷好識做用普通話大叫：「我愛你，MerryChristmas！」回敬。
事後仔仔接受訪問時話聖誕要為新碟去大馬宣傳，陪唔到女友大S，佢仲話：「沒關係，我們感情穩定，都是大人了，不會因此生氣。」佢又話新碟已經畀女友聽過。講到有傳佢同李冰冰爭唱新戲《蝴蝶飛》主題曲，仔仔話：「我沒聽過，冰冰唱得很好，我不會不開心。」
