呢期Blu-ray碟熱門話題係《2001太空漫遊》！雖然已經係1968年老戲，不過一直被奉為科幻電影中嘅經典，加上出自殿堂級史丹利寇比力克的大師手筆，可以話呢期必買；不過好多碟迷開機後驚嘆者，係聲畫表現靚到無倫，Remaster後嘅表現，真係靚似《虎膽龍威4.0》呢類近年大作，就連AVCONSULTANT嘅影音專家－李柏權（Alan），都話係歷年來聲畫做得最靚嘅版本，睇完記者套試片，馬上都話要買番隻看門口！
記者：朱崇德
攝影：譚盈傑
鳴謝：AVCONSULTANT（25812928）
《2001太空漫遊》可以話呢期Blu-ray熱碟！就連網上HD碟評專業網站－HIGH-DEFDIGEST，都將佢評為4.5星級別！須知新碟如《虎膽龍威4.0》、《反斗車王》先曾獲此等評級；就連《蜘蛛俠3》、《戰狼300》呢類極盡官能刺激之大片，都要輸個馬鼻得嗰4星評價，可想而知《2001》有幾勁！
太空科幻片經典
故事內容由猿人開始，由接觸天外來「黑石板」一刻開始進化為識用雙手器械；一塊骨頭掉上半空，就一跳躍進太空年代；乘搭載人太空船有如今人坐巴士，在月面基地竟發現同樣的黑石板，而且仲發放訊號射向木星！遠航的木星之旅因而開始；劃時代的冷凍艙飛船、人工智能的飛航電腦，以至電腦竟然有意識地保護自己不被「關掉」（殺害），反撲過來設下陷阱先殺起船員來！故事內容看似輕鬆平常，但緊記此片是1968年的電影，當時的電腦只是一間屋咁大嘅「計數機」，連太陽神11號都要在上畫後次年先登月，電影橋段每有似曾相識之感，皆因佢係科幻電影的鼻祖，現今的太空科幻片完全不能走出其腋窩！就連《星戰》大師佐治魯卡斯都喺Making話《2001》係俾佢踩住膊頭的一位巨人！
聲畫評：黑位過死底音嘶嘶聲
至於聲畫表現方面，68年老掉牙之電影，就算上到Blu-ray好多人都不抱太大期望；不過一行機馬上嚇親，雖則有60年代電影的粗微粒感覺，但大致感覺好滑淨，真係唔似咁舊嘅電影，影音專家Alan表示：「畫質靚唔靚，好大程度係影片本身質素，同收藏是否妥善的問題，相信《2001》兩者都做到……畫質方面，LD、DVD等好多個版本都睇過，都係以今次Blu-ray做得最正，以當年電影拍攝的節奏，加上仲以『漫遊』做題材，老實講我未試過一次過睇得完套戲而冇瞓着覺；今次Remaster得好正，飛船以至場景每一個細緻位都出晒，就連有時燈光馬虎打唔到都睇到，真係可用新角度重睇呢套經典！」「聲效方面，都算做得幾好，電影高音、低音位比較少，而且聲底仲好清楚聽到有啲『嘶嘶聲』，不過呢啲都係當年收音問題，唔關壓片技術問題，只可以講句，已經做到盡，可以收貨！」至於睇片碟機Setting方面，大家留意黑位會比較「死」，好多人會好自然咁推光啲，咁反而會令整體色調唔準確，所以照返平時正常Setting就最好，事關黑位「死黑」係冇得救㗎！
必睇Making
老女空姐講當年
戲中着晒緊身制服嘅空姐，睇片真係索到震；Making佢會再出返嚟現身說法，話畀你知支筆係點樣飄在半空，Hints係一塊玻璃加雙面膠紙。
