N82新玩法 一㩒掣定經緯

N82新玩法 一㩒掣定經緯

臨近聖誕,相信唔少人已經諗住買番部高像素影相手機,送朋友又好、旅行拍攝亦好,都係一個唔錯選擇!之不過500萬像素手機成行成市,點揀好呢?如果大家喜歡周遊列國,又鍾意隨處貢、搵好嘢食嘅話,Nokia新機N82就好啱你。皆因佢唔止配備蔡司鏡頭,仲內置GPS攝影模式,單憑一幅由N82影低嘅現場環境相,即可查出有關食肆、商場或油站嘅所在位置。至In的玩法,試過就知幾盞!

記者:陳國輝
攝影:陳盛臣

撈上flickr 花園餐廳現經緯

其實所謂嘅GPS攝影模式,就係將影相功能和全球定位系統合二為一咁解!玩法好簡單,只要啓動影相功能,然後你會睇見屏幕上方有一個「G」字符號,當顯示為綠色狀態,手機就會將現場環境嘅經度和緯度數據記低,再利用網絡相簿flickr(開啓嘅話),相簿內嘅地圖功能即可顯示出相片嘅所在位置。但如果「G」字符號呈紅色嘅話,就表示GPS功能尚未開啓或無法接收,用嗰陣記得注意喇!

■拍攝時最好身處室外環境,以便啓動GPS功能。

■將照片撈上flickr,即顯示經緯度資料。

即場示範:究竟單憑一張花園餐廳相片,點先可以搵到其所在位置?

假如用N82拍攝嘅話,基本上照片內已收集咗經緯度數據(N22°、E114°),再透過網上的flickr打開照片,你就會發現餐廳位置原來喺銅鑼灣!Nokia表示,呢項GPS攝影模式支援全球各地,唔淨止得香港,邊度都用得;至於顯示範圍有幾精細,則每個地方都有別。對筆者嚟講,呢項分唇的確新穎,亦相當實用,可惜N82唔直接支援flickr地圖功能,想玩惟有用Notebook或者Desktop喇!

■地圖上仲可顯示附近地名,不過係國語拼音。

500萬像素 一Take過拍Panorama

大家可能冇留意,N82除咗係一款500萬像素手機,原來仲首次支援Xenon閃光燈!不過近期同級機種如SonyEricssonK850i、LGViewty以及水貨SamsungG800等,配備嘅影相功能都差唔多。
值得一提係,N82還添置一Take過全景拍攝模式PanoMan,與傳統手機玩法相比,分別係唔使分幾次拍攝、毋須相駁相,只要順次序把鏡頭左右移動或原地轉一圈,手機會自動合成Panorama全景效果。雖然,呢項分唇非N82獨有,但用嚟影唔同嘅旅遊景色,當然非玩不可!

■N82具備真正DC用的Xenon閃光燈,最啱影夜景。

■跟住綠色箭嘴打橫移動鏡頭逐張拍攝,就可合成出全景相。

即Check!金屬感

■NSeries咁撐3G,當然唔少得一個視像鏡頭。

■數字鍵排列於光面嘅金屬殼上,甚為的骰。

■附送一張2GB記憶卡,最高支援4GB。

■機側例牌配快捷鍵,隔籬仲有快速相簿掣。

■插3.5mm耳筒聽MP3/
eAAC+/M4A/WMA都得。

■機身喇叭聲唔算靚,但用嚟上網睇串流已夠用。

■電池支援視像通話時間達到120分鐘,唔怕中途Cut線。

PROFILE

制式:WCDMA/GSM四頻
體積:112×50.2×17.3mm
重量:114g
通話時間:260分鐘(2G)
     190分鐘(3G)
備用時間:225小時(2G)
     210小時(3G)
主要功能:500萬像素相機、Xenon閃光燈、AGPS全球定位輔助系統、GPSCam、HSDPA、WLAN、支援N-Gage遊戲、FM收音機
查詢:Nokia(21366338)