【澳門直擊】巨型白松露菌前晚在澳門拍賣，影帝劉青雲攜眷到場湊熱鬧。大會又拍賣底價約7,800港元、重250克的白松露菌，青雲幫向華強舉手競投，結果首次參與拍賣的他，成功以78,000港元投得珍品。
白松露菌慈善拍賣會前晚在澳門新葡京宴會廳舉行，吸引了劉青雲與太太郭藹明、向華強一家、保良局主席陳小寶、霍震霆與兒子霍啓山及霍震寰一家等到場湊熱鬧。
「咁大個仔未試過」
前晚所見，影帝劉青雲也有參與競投其中一顆底價1,000美元（約7,800港元）、重250克的白松露菌，經過連番激烈競投後，最後青雲以10,000美元（約78,000港元）投得。至於另一份量較小的白松露菌，則由陳小寶以8,000美元（約62,000港元）投得。前晚拍賣共籌得334萬港元。
事後青雲接受訪問時表示，前晚其實是幫向華強的中國星競投，問他如何烹調白松露菌時，青雲笑說：「畀阿媽煲湯，為慈善做吓開心事啫！幾好玩吖，自己咁大個仔未試過喺拍賣場舉手，Amy（郭藹明）教我競投時要『責』住隻手，唔好亂抓『胳肋底』，今次係一個好開心嘅經驗。」
「搵個大廚煮嚟食」
有記者再問青雲如何處置白松露菌時，他繼續開玩笑說：「可能同老婆食早餐時刨少少落去囉！」對於青雲幫手投得心頭好，向華強說：「好開心，自己預咗20萬美金（約156萬港元）budget，遲啲會搵個大廚煮嚟食。」