圈中模範夫婦任達華和琦琦都是有品味的人，二人對生活甚有要求，就算拍拖出埠旅行，也會嚴選真正可以減壓的度假勝地。琦琦誠意推介法國康城，那裏除了氣氛浪漫外，天氣又好，景靚人靚，絕對稱得上是地靈人傑的好地方。 撰文：比華利
任達華和名模太太琦琦平日工作各有各忙，但只要夾好休息時間，便會拍拖出埠再度蜜月，讓夫婦感情永遠保持在熱戀階段，難怪二人結婚10年，感情仍然如膠似漆。
華仔夫婦的足迹早已遍及半個地球，提到最難忘的經歷，琦琦認為是前年和去年做跟得夫人，陪華仔到法國康城出席影展，由於行程緊密，故連續兩年都要暫時撇下年幼女兒任晴佳（Ella），但也令他們得以享受一下二人世界。
天氣怡人亁爽溫暖
不過廿四孝爹哋華仔始終惦掛女兒，他隨身攜帶Ella胖嘟嘟的靚相，還買了可愛的粉紅色啤啤熊做襯托，構思為Ella拍下「到此一遊」的照片，十分搞笑。
琦琦說：「華仔話點都影張相返去畀Ella睇，等佢開心吓，佢𠵱家太細，加上華仔係去做嘢，行程好緊密，或者等佢大個少少，我哋一定會帶佢去康城，影番張真相留念。」
康城影展每年在5月舉行，天氣怡人，琦琦說：「陽光好warm，又唔會太熱，天氣又亁爽，好舒服。」對康城讚不絕口的她說：「其實法國地方好多都好靚，感覺又浪漫，但康城畀人嘅感覺好特別，佢地方細細，餐廳或商店都好集中，嗰度仲有一個好靚嘅沙灘，始終亞洲區嘅生活節奏太快，每次去到康城，都畀到我好relax嘅度假感覺。」
只是在沙灘上漫步一下，或坐下來喝杯飲品，琦琦謂已令人有頓時叉足電的感覺，她說：「沙灘水清沙幼，瞓喺沙灘嘅男女都身材好，睇完好養眼。當華仔工作完陪我行一陣沙灘，我都好開心。」難怪看到琦琦和華仔在沙灘上拍的照片，都親密得如連體嬰一樣，羨煞旁人。
建築物富歐陸色彩
當地充滿歐陸色彩的建築物，在大街上隨處可見，琦琦說：「除咗風景靚，當地可能又係遊客區，加上歐洲人好識打扮，街上嘅人全部都welldress，睇到靚人靚景，真係心情都份外靚啲。」
琦琦指康城不少餐廳的水準都非常高，除地道法國菜外，也有美味的中餐，故到當地旅遊與其擔心天天啃麵包，倒不如擔心太多美食選擇導致心廣體胖，長出明顯的士啤胎。
話你知：必食朱古力雪糕
琦琦一向嗜甜，平日最愛吃蛋糕和雪糕，她推介到康城必吃薄荷朱古力雪糕，說：「味道又香濃又滑，口感十足，單球價錢大概10幾蚊港元，好抵食。」
話你知：必買特色紀念品
康城橫街有不少特色小舖，其中一間專賣色彩斑斕小玩具，琦琦說：「我每次都會買一啲小紀念品，嗰間小店仲有好多小玩意啱囡囡Ella，我次次都好有收穫。」
