敏妮禮拜六睇有線電視嘅地產節目，今個禮拜介紹咗唔少租平過供嘅單位，其中提到將軍澳呢個曾經係重災區嘅地點。敏妮用「曾經」呢個字眼，係因為家吓想喺將軍澳搵樓價200萬樓下嘅盤已經唔易，好多百幾萬嘅樓已經被炒到二百幾萬。
輸少當贏稍升即放
突然間諗起契大佬Kenny，佢同外母夾份投資層樓，家吓總算「守得雲開見月明」。點知佢話：「敏妮，輸少當贏啦。」又係一個有血有肉、用真金白銀買番嚟嘅教訓。
Kenny喺05年樓市小陽春時，買入將軍澳君傲灣，諗住摩貨轉手有賺，結果短炒變長揸。
「Kenny，近排將軍澳嘅樓價升得好急噃，應該仲未到頂，你過多一兩個月賣，可能唔止呢個價。」
經敏妮連番追問，原來佢當年近乎摸頂買入，經過幾年，難得樓市再起，為免夜長夢多，受過教訓嘅Kenny變成驚弓之鳥，「仲有呀敏妮，等係要成本㗎，供多兩個月樓，就要畀多兩個月利息。何況我買樓嗰陣，周圍啲經紀夠話實賺，好快就可以摩貨出去啦。」
其實Kenny嘅炒樓經驗，就好似唔少散戶買股票咁──個市升晒先入市，高追寧願坐貨都唔肯走，捱到隻股重拾升勢，就唔得切沽貨套現。不過，就好似新手揸車咁，係要碰撞過先累積到路面經驗。
重災區都有升值樓
雖然今次交咗啲學費，但起碼Kenny知道買樓一定要講location，即使係災區，都有可以升嘅樓；就好似股市一樣，即使市跌，一樣有逆市上升嘅股一樣。至於據Kenny真金白銀買番嚟嘅經驗，喺將軍澳得3個盤有升值潛力，包括新都城、東港城同維景灣畔。
http://manlitalk.com/blogs/