自1910年通車起，九廣鐵路經歷過蒸汽車、柴油車、電氣化火車時代的老員工已所餘無幾，66歲的何國松是其中一人。
指兵變因員工不甘心
1956年加入鐵路局當學徒，何國松服務九鐵近50年，今天九鐵將以合併形式退下歷史舞台，何國松慨嘆：「九鐵一百年歷史，就咁畀地鐵食咗好可惜，明明我哋係老大哥。」
何國松數年前告別九鐵大家庭正式退休，透過電視看到去年九鐵高層鬧兵變，何國松一語道破箇中原因：「唔甘心呀，邊個服氣？我哋成百年歷史，當年地鐵通車前都係我哋協助培訓員工。」
不過，今天碰見黎文熹，大家只談風月，與詹伯樂飲茶則開懷大笑。「詹伯樂最開心，佢話諗都冇諗過自己70幾歲，竟然有機會做九鐵CEO。」
自小便立志要加入九廣鐵路局，1956年何國松中三畢業，應徵政府學徒。「當年有3,000人報名，第一次筆試考中、英、數三科，每科一個鐘，最高分300人進入第二圈考智力題，最後篩剩30人。」
首日到紅磡車站報到，何國松便要提着工具箱跟師傅工作。「總之師傅做乜你就做乜，自己睇住學，冇人會捉住手教你。」何國松由清潔到修理一腳踢，兩周發薪一次48元，計算加班費在內，月薪逾100元。「話晒係政府工，人工算幾好，當時一碟飯唔使5毫子。」
自製蒸汽零件裝配維修
當時車廠內共有5部蒸汽火車頭，何國松每天都要學習清理和維修，遇有零件損毀，他還要學習自製零件裝配，其後蒸汽車頭由燒煤改裝成燒重油，亦由何國松和同事設計改裝。「重油冇煤咁污染，又唔使鏟煤咁辛苦，但缺點係好容易火燭。」
1962年九鐵全面進入柴油車年代，何國松雖不捨得蒸汽車頭，但也不得不承認柴油車可靠性和馬力遠勝一籌，當年單日客運人數便破紀錄逾62,000人次。記者林浚川
九鐵百年大事表
‧1910年：九廣鐵路（英段）通車，包括油麻地、沙田、大埔及粉嶺站
‧1911年：九廣鐵路（華段）通車，粵港直通車投入服務
‧1916年：尖沙嘴總站啓用，鐘樓則延至5年後才完工
‧1936年：開創九龍至廣州不停站服務
‧1941年：日軍佔領香港，鐵路損毀，服務幾近暫停
‧1955年：兩台柴油機車投入服務，7年後所有蒸汽火車頭退役
‧1975年：紅磡新車站啓用，取代尖沙嘴站
‧1979年：粵港直通車自1949年後重開
‧1982年：九廣鐵路公司成立，取代九廣鐵路局
‧1983年：九鐵正式全面電氣化
‧1988年：輕鐵系統投入服務
‧1993年：九鐵電視廣告被指鬼影幢幢，成為全城熱話
‧2003年：西鐵通車
‧2004年：政府與兩鐵研究合併，馬鐵通車
‧2006年：九鐵高層兵變失敗，署理行政總裁黎文熹辭職
‧2007年：落馬洲支線通車，兩鐵今日合併
資料來源：九鐵
