上周食晏時行經時代廣場，看見搭了表演台有show搞，睇吓個背景大板，原來是南華為吉祥物「波南」、「草南」搞宣傳活動，可惜因為趕住開工，沒能留下睇節目，惟有後來上網找球隊的部落格，看看這兩個卡通公仔有乜搞作。結果卻有意外收穫，看到足主羅傑承「哭馬喪」的網誌。
南華呢支本地班霸近期銀牌賽大數對手，聯賽又繼續贏波保持領先優勢，成績好當然唔駛喊，羅先生篇網誌係上月初嘅，當天南華大數流浪9比1，翌日有馬跑，擁南躉球迷心水清，識波之外更知足主有兩匹團體馬將上陣，問其攞貼士，結果兩匹馬都落第而回。
當足主與馬主，都有一個共通點，就是想贏想威，羅先生搞足球已成球迷偶像，另一邊廂的「教練」（練馬師）話ok噃，當然不吝嗇讓fans捧場。不過，馬壇比球壇勢均力敵得多，文化亦有不同，有5成希望跑入前5名，都會叫買例飛捧吓場，「餐士」的意義大有不同也。事實上，其中一匹馬上周日再上陣，就跑了第2名呢！另一匹馬下回再出時，擁躉要醒目吼住了。
張美德
mailto:[email protected]