左派土共總動員助選，葉劉似乎勝券在握，噚日拉票時有心情搞爛gag，有人問佢有冇信心必勝，佢「懶」幽默咁講：「必勝？pizza先有必勝。」在場人士估唔到佢忽然搞笑，冇人識俾反應。未到投票日葉劉已經咁風騷，俾佢入到局，佢出年肯定再選連任四年，大家喊都無謂；如果佢落選，就要同民建聯就出年排陣講數，屆時左派鬼打鬼，咁就大把戲睇咯。
北京傳聲筒已夠多
唔投票俾葉劉一舉兩得，至於呢場戲有冇得睇，就視乎大家今日點投票嘞。八方提醒大家，葉劉推23條時嘴臉猙獰，唔係𠵱家講吓笑話、道個歉就值得原諒。可能有人話，人誰無過，洗心革面嘅話，俾多個機會葉劉啦。咁03年點解佢又唔俾多個機會香港人？當年50萬人上街，大家只係想佢就23條推出白紙草案，俾大家睇清睇楚條法律內容，不過佢冇俾呢個機會我哋，只係聽阿爺講，佢今次獲北京全力保送入立法會，大家認為佢上位後會聽香港民意，定係聽北京話呢？
立法會入面已經有幾十個北京傳聲筒，投票俾葉劉，無非令立法會多一個聽阿爺話嘅橡皮圖章，咁呢票投嚟有乜意義呢？唔通你嫌立法會啲左口左面仲唔夠多咩！