《福布斯》嘅富豪名單，被稱為「實聽拉的名單」，上得榜嘅通常都出事。不過，上得《福布斯》點都唔係二打六，無論個人定企業，個個都有番咁上下，好似女性內衣品牌安莉芳（1388）就剛啱入選咗2007年「福布斯200家中小型企業家」。
今次《福布斯》係喺亞太區超過2.2萬家，營收低過10億美金中小上市企業中，按佢哋過去3年持續盈利能力同增長情況作為指標，選出200家最好嘅中小企，真係唔容易入到榜㗎。
咁入到榜嘅安莉芳當然開心，佢哋嘅行政總裁兼執行董事鄭碧浩話，入選唔止印證集團過去多年嚟嘅努力、喺市場上建立領導地位，同時亦對集團未來長遠發展有幫助……最緊要嗰句係：「為投資者及股東帶嚟更豐盛回報。」真係識講嘢。