陳太對葉劉世紀大戰全香港人關心，連移民海外嘅港人都好肉緊，十幾個美、加海外民運組織發出公開聲明，呼籲港島區選民支持普選，今日一定要去投票。佢哋話由於唔係香港選民，所以唔方便幫某一位候選人拉票，不過泛民主派較能維護香港民主，所以建議大家投泛民支持候選人。八方幫佢哋清楚表態，即係7號陳太。
卡加利中國民主促進會負責人鄭保羅（Paul）同八方講，上述美、加民運組織多數由香港移民組成，大家同聲同氣，都好關注香港民主發展，所以聯合發出聲明，同時發動各地香港移民打長途電話，呼籲係港島區選民嘅親戚朋友今日去投票，佢話連當地中文電台都有催票，為香港民主出一分力。
Paul話好難估計可以動員到幾多人投票，不過海外香港人都有個感覺，就係越多人投票對陳太越有利，否則陳太隨時俾左派鐵票淹沒。多倫多支聯會主席關卓中話，華叔俾港府告參與非法廣播，令人憂慮特區政府逐漸收緊言論自由，所以今次補選一定要選個真正維護民主嘅人。香港人收到啦，唔好俾人呃呀！