立法會港島區補選今日大決戰，係民主勝利定係左派報捷，就睇港島區選民今日抉擇。今次唔係兩太之爭咁簡單，陳太當選，證明香港人追求民主之心不死；葉劉勝出，意味北京鎮壓香港民主懷柔政策大獲全勝，香港人連葉劉都支持，即係唔「恨」普選！港島區選民，民主前路係晴係陰，你呢票投畀北京，定係投番畀香港人，請諗清楚。
大戰前夕，久經政治風浪嘅陳太好整以暇，噚晚同丈夫陳棣榮過二人世界，佢話宣佈參選後冇時停，日出而作，日入而息，連睇電視時間都冇，佢又話雖然近排冇做運動，但都輕咗好多磅，可見落區拉票好辛苦。
陳太話支持者鼓勵令佢好感動，最心甜一次，係有個婆婆燉咗樽燕窩畀佢，同佢講要好好保重身體，注意補身，否則當選都冇精力服務香港人。樽燕窩斤兩十足固然令人動容，最感動係婆婆花心機、時間燉燕窩，如果八方收到咁貴重禮物，真係唔捨得食都似。
成敗影響民主運動
大家真係想幫陳太嘅，唔使畀成擔心機燉燕窩，實實際際畀張選票佢好過，唔係港島區選民都唔緊要，今日抽時間打個電話或SMS畀住喺香港島親友，提醒佢哋去投票。大家唔好以為陳太贏梗，八方收到風，過去一個星期，好多喺內地工作、開廠嘅香港人，紛紛接獲內地生意拍檔、地方幹部通知，今日要返香港全家總動員投票，當然「希望」佢哋投阿爺支持嗰位啦，如果佢哋都聽話，陳太勝算真係凍過水。
不過八方提醒大家一句，香港投票係保密嘅，唔使怕受威嚇或秋後算賬，一定要憑良心投票。陳太落選，唔係佢一個人失敗，而係象徵03年7.1大遊行以來整個民主運動告終，50萬人上街得來嘅成果一筆勾銷，若非當年香港人群起抵抗政府，老董、葉劉等人會落台？當年大家誓要葉劉倒台，點解今日可以眼白白睇住佢意氣風發班師回朝？
越多人投票畀陳太，對曾蔭權、北京壓力就越大，今次香港人唔遊行，只係要用選票向北京表態，我哋唔要葉劉，我哋要雙普選。八方相信，葉劉當選一刻，就係北京強硬打壓香港民主之時，大家唔想後悔，今日一家要去投票。