為咗選票，有時真係乜招數都使得出。繼道歉、瞓公屋、公開悼念亡夫後，葉劉噚日出埋最後一張親民牌，中午時不惜企喺街邊食飯盒，結果搞到鯁親，認真尷尬。
朝早經歷一輪狂風掃落葉式拉票活動後，葉劉中午時去到杏花邨小休，並就地開餐食飯盒。佢好似唔怕食塵，喺街邊打開盒叉燒燒肉飯就扒飯，記者見佢食得咁心急，問佢係咪好少捱飯盒，佢要答問題即時鯁親，一路打思噎一路講，「以前去立法會開會時，都成日食叉燒飯，喺街邊食就真係第一次嘞！」
拜會「社團大佬」
老細企喺度唔返上車食飯，其他助選團成員都唔敢坐低食飯盒，通通陪葉劉做街頭食飯show，齊齊攞住飯盒畀記者影相。據助選團人員講，飯盒喺附近食肆買，買到嚟就食，唔係名牌鏞記出品。入夜後選情越來越緊湊，葉劉可能都好緊張，冇心機食晚飯。
左派社團拖男帶女、全體出動幫葉劉助選，與其話葉劉噚日去拉票，不如話佢去謝票還人情仲貼切，呢啲人情債，睇怕佢有排還。佢由朝早7點半出發，去咗十幾個選區，實際上係去拜會唔同「社團大佬」，福建、潮州兩大同鄉會對佢最熱情，前醫管局高層高永文醫生都有到場，佢話係以潮州同鄉會副會長身份支持葉劉。
福建同鄉會大佬楊孫西擦完一大輪葉劉鞋後，突然大嗌口號，不過佢記性差啲，竟然嗌咗：「我地今日會全力支持劉太！」全場人忍住笑，葉劉就當聽唔到。