航天科技（031）上周五宣佈，與大股東中國航天科技集團及深圳航天研究院成立合資公司，從事實業、衞星相關產品研發及基建建設相關業務，3公司分佔六成、兩成及兩成股權，註冊資金7億元人民幣，航科出資約4.33億元。該份通告同時建議公司改名為中國航天國際控股有限公司。
航科呢間紅籌公司講注資都講咗好耐，今次成立合營，總算係一次進步，起碼唔使得個講字。同系航科通信（1185）早前都係獲得注資，而且係注入有概念支持嘅清潔能源業務，惟股價在注資後表現不濟，應係同市況有關，同時所注入資產予人有點「炒雜燴」之感。
今次航科與母公司及深圳航天所成立的合資公司，講明從事實業、衞星相關產品研發及基建建設相關業務，其中衞星相關產品業務係有合理預期，母公司大把相關資產可注入合營，基建建設則應涉及母公司在海南省文昌市建設，全球最大規模的航天主題園，預期投資金額達70億元人民幣。
改定名等注資
紅籌獲母公司注資，早前已有香港中旅（308）及中化化肥（297），惟以消息公佈後表現來看，市況唔就幾好消息都無用，不過一旦市況轉旺，股民磨拳擦掌搵股炒時，改埋名做控股公司嘅航科最有機會炒上。
華置仍有水位
華置（127）與至祥（112）互換資產計劃，遭逾9成投票股東投反對票被否決。德銀隨即發表報告，指互換資產交易未獲股東通過，並不影響華置估值，因為交易並不涉及任何現金或將資產出售。德銀反而欣賞華置近期出售其於平保（2318）的投資，目前已減至5%以下，預料華置有機會繼續減持，重申華置買入評級，目標價17.80元。今次互換搞唔成，市場反應居然係炒上，應係因為華置喺香港地產股中仍然落後，加上大股東頻頻增持，呢啲位買仍有可博水位。