前些時蝙蝠俠來香港拍外景，曾有報道話蝙蝠俠本來會從直升機跳落維多利亞港，製造驚險一幕，但後來呢個鏡頭取消咗，原因係維港海水污染，跌落水會影響男主角健康喎。後來導演見記者，講明冇咁嘅事，如果劇情需要嘅話，男主角一定唔會惜身。
呢日有機會見到教授W，醒起佢係海洋生態/控制污染專家，於是問佢：「兩條問題：（一）可否在維港游水？（二）維港水質是否日益污染，衰過舊時，嚇親外國人？」教授W主持一個海洋環境研究所，得政府大力撥款支持成為卓越學域（AreaofExcellence），對維港及吐露港嘅水質變化瞭如指掌，佢哋創製咗一件「人造青口」，唔食得嘅，而係化學合成品，放入海中，量度海水嘅含重金屬量及其他污染物質，十分準確，已經被好多個國家採用，用以監控海水清潔度。教授W話：「（一）維港水質適宜游水，但填海填得多，水流太急，不宜游水。（二）維港水質其實係越嚟越好，只不過有兩個死角，一個係啓德機場跑道之南，一個係昂船洲一帶有污水處理工程，兩度都幾臭。」
佢再講落去，左丁山就唔多明白嘞，於是佢叫左丁山去佢屋企，與佢嘅一班生物系同學重聚，包括大學校長T，前許老爺新聞秘書K太等等，但時間不合，只得作罷。佢哋班生物系同學當年每到冬天，就要全系一齊到新界郊野露營採集標本，考察環境，故此培養出佢哋一班人嘅團隊精神。既然十位八位同學重聚，返母校與二三千人重聚，又好唔好呢？十二月九日星期日下午十二點開始，中大校園有個中大校友日，校友與子女回校可參觀最新落成之中大考古博物館、文物館、大學圖書館、兒童節目、攤位遊戲，參加「回到課室精選講座」，有劉遵義校長講TheEconomicsofHealthcare，建築系何培斌教授講校園建築，中醫教授梁直英講中醫防癌，精神科榮潤國教授講如何可以安枕無憂；此外有書院晚餐（個別書院院長主持）、學系開放參觀。中大人要報名參加嘅話，今日係最後一天，快啲上網登記（www.alumni.cuhk.edu.hk）。