唔少新興國家辦大選之時，貪污買票之風大盛，當權派為保地位，往往出盡不少茅招，務求勝利。歐盟好多次派出選舉監督團去呢啲國家監察選舉，當然不受歡迎啦，在佢哋眼中，歐盟選舉監督團就係「外國勢力干預內政」，非罵不可。
世事真奇，俄羅斯強人總統普京近年銳意重振昔日蘇聯雄風，對美國都唔畀面，對歐盟更加不放在眼內，但係俄羅斯國家杜馬（即議會下院）喺今日十二月二日舉行，普京嘅統一俄羅斯黨在民調遙遙領先，應該贏梗，而歐盟懶得派出選舉監督團到俄羅斯，普京竟然大罵歐盟，話歐盟不派員監督，係屈服於美國壓力，故意「讓這次選舉看上去不合法。」
自己國家選舉，根據本國法律進行，何必邀請外國「干預」，「證明合法」？普京顯然心裏有鬼，覺得冇外國勢力睇住自己嘅黨大勝，將來會俾國際社會講閒話。普京心裏之鬼，就係想做完強人總統之後，既然按憲法唔可以連任，就轉做執政黨領袖兼任總理，將新總統架空，自己仍然掌握實權。
絕對權力，絕對腐化，普京戀棧不去，就係利用人民崇拜強人之民族主義心理，令自己永遠執政。成熟之民主社會不會一黨獨大，多數係兩黨輪番執政，以保持當權政客謙卑虛懷之心，令佢哋不敢驕橫狂妄，踐踏人權。澳洲就係好例子啦，霍華德執政十二年，成績驕人，澳洲經濟空前強勁，失業率創歷史新低，期內成功主辦二○○○年雪梨奧運，澳洲人面子攞足，上個月大選，霍華德仲唔贏梗？澳洲選民好似戰後英國選民咁有理智，用選票捧反對黨工黨上台，趕走霍華德，似足當年英國人送走民族大英雄邱吉爾。
今日香港島有立法會議員席位補選，港島區選民請務必行使公民權利，為香港爭取早日有普選民主體制，為香港政治生態均衡，為免一派獨大，所有選民請投票，請投良心一票。