陳太參選泛民主派幾乎總動員幫佢拉票，其實陳太陣營入面仲有一班中堅分子，就係陳太家族成員，八方打聽到嘅消息，呢批「方家軍」為數約20人，喺助選團入面各司其職，噚晚分別到唔同票站負責監票，日間則巡迴全港島拉票，十分落力，呢班方家軍有陳太做榜樣，隨時成為未來政壇新力量。
陳太姪兒方欣然（Sean）今次主力負責開拓網民票源，幫陳太喺facebook拉票，又親自幫陳太拍短片向網友介紹政綱，網民反應熱烈，連葉劉都要跟風喺facebook開戶。Sean噚日同八方講，佢覺得自己價值觀同陳太好似，都係想為香港做啲嘢，所以好落力幫手拉票，佢又指陳太年紀唔細，但都勇於出嚟參選，令佢好感動。Sean係大律師，暫時未有從政興趣，「不過日後會唔會參政，𠵱家好難講。」
為香港做事全家支持
陳太另一姪兒方欣漢係ball場常客，噚日都全日拉票，佢現時做基金投資工作，雖然冇興趣從政，但好支持家人參選，「我哋一家人好團結，為香港做事，全家人都會支持。」陳太堂妹方敏生係社聯行政總裁，04年佢角逐立法會社福界議席落選，去年當選社福界選委，喺陳太家族中選舉經驗最豐富，今次係陳太競選「心戰室」成員之一，幫手分析選情、動員同制訂策略，佢噚日話陳太唔輸得，所以家族總動員助選，至於佢出年會否捲土重來暫未考慮，「贏咗今次選舉先算。」
「方家軍」上陣打江山，陳太女兒陳慧玲則貼身打點，八方噚日問陳慧玲應付選戰係咪好辛苦，佢話經歷呢次選舉，先知道身體力行係實踐信念最好方法，若母親當選，有需要嘅話佢樂意繼續幫手做地區工作，但冇諗過自己去上陣參選，「我𠵱家係個主婦咋。」
家族成員幫手拉票，分擔咗陳太唔少壓力，陳太一家人噚日朝早去完教堂後，齊齊去投票，外孫女Michelle透露外公陳棣榮留守屋企大本營，佢爸爸、即係陳太女婿就做司機，而陳太孖生妹妹方寧生就驚嘆家姐毅力驚人，「佢日以繼夜拉票都唔攰，真係好好精力。」