《DieHard4.0》點解唔叫《DieHard4》？原來今集劇情涉及大量電腦網絡內容，所以連戲名都「晉身」為4.0。不過講到成齣戲，當然唔少得BruceWillis個人表演，由頭打到尾，直接來講係由開始破壞到結束，所到之處體無完膚，絕對畀到戲迷官能刺激。若再加埋睇新推出Blu-ray版，聲效逼真，更有炸到埋身嘅感覺！
記者：許福合
人老身手不老
《DieHard4.0》於戲院上映時，影評毀譽參半，但作為DieHard死忠嘅影音發燒友TommyWu，對電影仍然有好高評價，而且一出Blu-ray更第一時間買來欣賞。睇完之後，佢第一個反應就係：「BruceWillis真係老咗好多！」唔講4.0同上一集相距十多年時間，據網料話齋Bruce已達52歲「高齡」，喺戲院睇矇矇哋唔多覺，不過轉睇BD版Bruce即時老態畢現，加埋個光頭，頭上電車軌隨時見幾條，面容亦明顯老咗。雖然《DieHard4.0》劇情公式化，不過戲迷主要都係為睇Bruce「打餐飽」，老Bruce喺打鬥場面方面仍交足貨，身手敏捷非常。
聲效現場感逼真
經常都聽到話想睇電影逼真啲，就一定要入場睇！Tommy就話：「《DieHard4.0》因為爆炸、破壞連場，只要屋企影音裝備有一定水準，先可以感覺到逼真效果。」《DieHard4.0》BD版本身支援DTSHD5.1MasterLosslessAudio，喺爆炸場面方面更能顯現震撼聲效，配合幾幕超誇張場面，如貨車竟然被戰機追殺等，配合聲效非常真實。另外，BD版畫面銳利度非常高，有幾場Bruce正在駕車畫面，人物Sharp到好似同背景分開一樣，至於效果好唔好真係見仁見智喇！
同戲院上映時一樣，要認真睇劇情可能較為失望，不過對熱愛激打、爆炸連場，《DieHard4.0》BD版就更能睇出原味！
激爆場面
售價：$239
查詢：得利影視（27870678）
