港股上個月跌咗2709點，係10年嚟最差，算唔算係股災年呢？咁就睇你用乜嘢標準。不過，以殺傷力嚟睇就應該係嘞，因為單睇指數嘅變化係睇唔到嘅，個別股票跌幅閒閒哋四五成，加埋之前嘅波動，跌咗六七成嘅股票其實唔少。
事實上，股價嘅跌幅並冇全面反映實況，因為好多股民揸住嘅蟹貨尚未鬆綁，指數反映唔到呢啲損失。
個市跌完未？市場有唔同嘅意見，但係上個禮拜五花旗股市上升，港股今日開市唔應該失禮，煤炭股呢幾日個勢好番好多，可以留意。
中煤C輪4858：中煤（1898）現價24.65元，走勢好靚，有機會上試27.5元同29.5元，可以諗吓隻C輪4858，隻輪現價53仙，槓桿率4.6倍（有效3.1倍），對冲值0.67，正股升到上面兩個價，4858應該喺73仙同89仙樓上，正股跌穿23元止蝕。