補選有八個候選人，呢啲全城矚目大賽，同睇賽車差唔多，領先兩架頭車由頭帶到尾，後面一大堆車死追爛追，陪跑到尾都冇乜人理。八方噚日問過其餘六位候選人最後衝刺拉票情況，蔣志偉最有鬥心，今日一朝早會喺小西灣坐花車出發拉票，然後巡迴全港島投票站派傳單，直踩到夜晚10點半截止投票！
經費有限冇車巡區
蔣志偉揸貨車出身，職業習慣堅持跑到尾，其他人卻未必咁有體育精神鬥到最後一秒。八方問過蕭思江同李永健，兩人講到明今日拉票點到即止，夜晚約7點就收工去食飯，抖到10點半先去灣仔會展新聞中心等結果。
另一位候選人柳玉成話自己住九龍，唔使一早起身去投票，所以朝早9點至會搵埋三架車開始喺香港公園票站拉票，佢話搵到五個義工幫手。
凌尉雲話自己競選經費有限，所以冇宣傳車巡區，只會同一班義工到幾個大票站派傳單。佢好老實咁講，唔旨望贏，目標係攞到百分之五選票，拎得返五萬蚊選舉按金就心足。另一位女將何來話冇人冇物，戰線不能太長，只可以打陣地戰，之前去過西區、南區同灣仔拉票，今日集中喺東區嗌咪。