噚日係立法會港島區補選嘅大日子，今次選舉兩太對壘，其間仲有匿名信事件，矛頭直指陳太。講開又講，除咗選舉「興」用匿名信抹黑對手，股票市場一樣流行匿名信。好似今年新股熱爆，年初至今總共有71隻新股上市，係03年以嚟嘅新高，多隻新股臨上市前，都有匿名信「贈興」。
匿名信攻擊通常都係批評公司賬目，目的係阻延上市進度。講到最頭痕，就係由高寶綠色（274）分拆出嚟嘅真優美（3332），先後收到兩封匿名信，搞到兩度延遲招股日期，你知家吓個市一日上落千幾點，推延上市日期真係可大可小。
真優美原本計劃11月30至12月5號招股，12月12號掛牌，點知招股前3日，傳媒收到電郵同手機短訊，話真優美造假賬、產品含水銀，累到要推延招股期到12月3至6號，上市改為13號。解話完畢，以為一切擺平，點知上個禮拜五，又收到匿名信，指佢涉嫌偽造銷售數據，匿名人士仲話人身受威脅，收到死亡恐嚇，就係咁，真優美又將招股日期延遲一日，上市日期就要再等宣佈。
金山軟件最硬淨
今年仲有3隻新股收到匿名信，金山軟件（3888）招股前，港交所同傳媒都收到匿名信，質疑佢賬目，但冇影響到上市首日表現，股價勁升近四成。天能動力（819）就俾人話涉及多宗污染事件，上市首日股價微升2.6%，但第二日就腳軟，一個禮拜後更跌破招股價。至於互太紡織（1382）就被指番禺廠房非法排污，上市首日就守唔住招股價，跌1.7%，跟住仲係咁跌，上市咁耐只有一日浮出水面。
雖然3隻股最後都按計劃上市，但講到股價，除咗金山軟件硬淨啲，股價仲企穩喺招股價樓上，互太紡織已經潛咗水，上周五較招股價跌五成五，而天能動力就打個和，上周收報同招股價一樣，冇升跌。
今年新股收匿名信事件簿
30/11/07
真優美（3332）
首日股價表現：不適用
股價上市至今：不適用
27/11/07
真優美（3332）
首日股價表現：不適用
股價上市至今：不適用
25/09/07
金山軟件（3888）
首日股價表現：+38.9%
股價上市至今：+12.2%
22/05/07
天能動力（819）
首日股價表現：+2.6%
股價上市至今：0%
02/05/07
互太紡織（1382）
首日股價表現：-1.7%
股價上市至今：-55.1%
香港良心都收信
講番噚日港島區立法會議席補選，大熱嘅香港良心陳方安生被人用匿名信攻擊。署名「一個銀行小職員」嘅人電郵到報館，話陳太個女陳慧玲喺93年，用九成一按揭，買咗天后廟道一個單位，封信話，佢個女借陳太名，先做到咁高成數嘅按揭。不過，93年嘅事，為乜家吓人哋出嚟選舉先爆畀傳媒？就真係要問吓呢位「一個銀行小職員」。
就正如公司臨上市前，你先話佢造假賬，造假賬犯法㗎喎，點解唔一早就告發佢，要等人哋上市前，先用匿名信嚟篤爆人呢呵？
上海杏靈冇蹤影
公司上市收到匿名信「贈興」都唔係罕見，舊年掛牌嘅大陸超市京客隆（8245），傳聞由於匿名信拖累要推遲上市。據傳聞話，京客隆原本舊年4月已經獲港交所批准上市，但後尾交易所收到匿名信，質疑公司賬目，京客隆嘅解釋未能令上市委員會釋疑，搞到原先畀佢上市嘅決定要推翻。
不過，真金不怕烘爐火又好，大難不死必有後福又好，京客隆等到舊年9月尾成功上市，首日掛牌，股價升兩成二，上個禮拜五收報6.15蚊，累積升幅近三成七。
除咗京客隆，02年8月大陸有隻藥業股上海杏靈，原本諗住以配售形式掛牌，但又係因為匿名信，話間公司違反供貨合約，喺上市前一日通知港交所終止配售同押後上市，杏靈後尾解釋話唔關匿名信事，只係為咗避跌市，遲吓會再上喎，但到家陣影都唔見。
mailto:[email protected]
