廣告大戰ADWAR　牛頭馬面得民心

「你做緊咩？」「寬頻上網囉！」連貝爾和牛頭馬面都出動埋。對手來一招暗笑他們為鼠輩「鋪少少，扮代表！」為反擊，再急忙出新篇《纖王真面目》「環繞地球26個圈？好勁喎！」久違了的廣告大戰，比SUNDAY時代《毫三子》更抵死過癮。一邊人多勢眾，一邊名氣大、財力厚，互相嘲弄，鬥得難分難解。睇戲觀眾不理誰是誰非，只知好耐未試過睇廣告會笑出聲。呢場廣告硬仗立時成為城中熱話，牛頭馬面似乎憑搞笑贏得民心？醒目人就知，佢哋雙贏至真！

記者︰陸俊雄
攝影︰陳盛臣

大戰時間表

（1）9月中，香港寬頻《爬電話線》的廣告引發Campaign開始。

（2）11月頭，香港寬頻《牛頭馬面》和《螞蟻上下載》的廣告出現。

（3）11月23日PCCW馬上推出老鼠廣告以「光纖環繞地球26周」反擊。

（4）11月27日香港寬頻以《纖王真面目》平面廣告回應。

牛頭馬面幕後主腦

近期寬頻廣告大鬥法，連小克都出動，為香港寬頻在報紙上畫了全版的漫畫廣告。在香港少見之餘，亦令觀眾睇得津津有味。到底是那間廣告公司的傑作？香港寬頻方面其實是由陳慧為首的4As廣告公司M&CSaatchi炮製，而PCCW是朱祖兒的CommunionW。

■香港寬頻廣告原來在泰國拍攝，牛頭馬面係泰國人來的，真係估佢唔到。

M&CSaatchi對上一次的大作是KFC的「SoReal」，行政創作總監陳慧：「和香港寬頻合作只有4個月，劉翔之後的廣告才是他們出品。其實牛頭馬面廣告主旨不是攻擊對手，但因為市場上冇比較，搞到我哋好似諷刺佢哋。我哋想講市民有多一個選擇，提醒佢哋用電話線上網到底有咩問題。廣告其實好Informative。」創作總監Francis認為土炮漫畫越來越被看低一線，但小克是個異數；加上好少報章出全版漫畫做廣告，覺得這奇招可行，於是找來陳慧的大學同學——小克出手。

■M&CSaatchi的創作團隊：（前排左起）小克、Francis、陳慧；（後排左起）浩仔、Mike、Curtis。

TVB插手改內容

廣告出街前經過無數次修改，這是家常便飯，但陳慧亦道出語帶諷刺的廣告，遇到的阻力會更大。「對手係BigPlayer，而且和Media的關係很好，好有控制力。所以廣告交到TVB時，亦因為對白說得『太明』而被要求修改。到廣告出街，其實冇預計過對手會還擊。」面對突如其來的老鼠廣告，Francis說︰「23號當日，一見對手廣告出街，當晚即刻返公司，即時度橋，急Call小克再畫，王維基也親自到來捱夜開會。結果星期一中午完成所有工作，星期二《纖王真面目》出街。」ArtDirector浩仔都說︰「連續兩晚通宵，不過好有成功感。」陳慧更不忘補充，是因為王維基作風大膽，肯將事情放在枱面回應，大家才睇得過癮。「香港近年的廣告傾向靚，但引起大家注意的實在太少了。」

■未交給小克前的初稿，大家肯定未見過。

■陳慧亦很大膽，說TVB有要求過他們改對白內容。

2D打荷李活動畫

其實不論是牛頭馬面、貝爾定螞蟻，都是小克在極短時間下，和M&CSaatchi創作部嘔心瀝血度出來。但令他最有感覺的，反而是那個有心畫得最原始和簡陋的地球：「我覺得好似香港電影挑戰荷李活咁！」有感而發，全因PCCW那個環繞地球26周廣告的CG太靚了。小克亦不禁生疑︰「出了牛頭馬面後，唔明對手點能夠反擊得咁快，因為畫CG需要很多時間。不過可能在爬電話線廣告推出後，對手已經預備還擊。廣告一出，大家撞到正。」這樣明目張膽挑戰大台，小克亦有朋友問過佢，會否怕斷絕和PCCW合作的機會？「都係做好手上工作啫！冇擔心過這問題。」雖然電視和報章上的廣告，開始告一段落，但手上工作排得密密的他，還要為香港寬頻轉戰到網站，因為緊接會有牛頭馬面網站推出。