香港政府成日大力宣傳叫人停車要熄匙，減少廢氣排放，大佬，你估車主嫌油錢平咩！尤其好多職業司機，有時開開吓工有啲睡意，都會停低架車休息吓，有時天氣太熱或太焗，唔開冷氣都唔得。日本喺呢方面就先進得多，因為家陣喺神奈川縣同大和市都開設咗設有供電設備嘅貨車停車場，專畀職業車司機泊車兼休息。只要用條駁線將供電器同架車連接，咁就熄車都可以開着冷氣及其他電子產品。以每小時計，空轉引擎油錢約港幣11蚊，而齋用供電器就只需港幣5蚊電費左右，慳錢兼環保。但係要享受咁好嘅服務，車主首先要用港幣約二萬蚊加設駁電設備及其他改裝，值唔值就見仁見智喇。
停車場發言人就話，如果以每年1,000至2,000小時使用量嚟計，約2至3年就可以省回改裝費所花嘅錢，對職業司機嚟講係好化算嘅。之但係小記覺得，為着環保及其他人健康着想，莫講話慳錢，就算要花多啲都應該支持嘅！
文：周達之