紐卡素上周六作客布力般流浪場英超聯，喺領先1球下反輸1:3；一班捧場客同埋紐記球迷固然唔開心，領隊「大儍」艾拿廸斯更加係有得震、冇得瞓。據英傳媒報道，紐記近5場聯賽只得1和4負，如果喺周三補賽迎戰榜首嘅阿仙奴時再有差池嘅話，艾拿廸斯就會烏紗不保。
祖爾巴頓撐「大儍」
記得「大儍」今夏加盟紐記時不知幾高調，一副紐記救世主模樣；當時仲有唔少人覺得教紐記不過係佢執教英格蘭國家隊嘅踏腳石。點知，紐記季初一陣虛火後無以為繼，𠵱家位列中游，要同「Big4」爭，明顯未夠班，表現亦比唔上幾支異軍好似阿士東維拉、老樸同曼城。
「大儍」唔單止領軍功力受質疑，佢最近仲畀「契仔」、中場祖爾巴頓跣。祖爾巴頓係「大儍」執教紐記後首個要用錢簽嚟嘅球員，「大儍」一向好欣賞佢，兩人亦情同父子。眼見「大儍」被插，祖爾巴頓喺對布力般賽前就開口大鬧紐卡素球迷冇品，話佢哋從來唔畀時間球星同領隊去證明自己，淨係識得狂噓狂插，又暗示會同「大儍」共同進退。
祖爾巴頓咁講可能係出於好意，不過佢用字鬼咁激，加上佢個底鬼咁花，搞到「大儍」喺輸畀布力般後，都唔理自己個領隊位危危乎，反而第一時間出嚟保住祖爾巴頓，話佢係出於好意，對紐記球迷「愛之深、責之切」先會咁講。
唉！好一幕父子情深。我求大俠雖然唔係紐記球迷，但都唔想艾拿廸斯同祖爾巴頓好似港產片《父子》咁，兩父子成日累鬥累。