黃大仙劉小姐噚日推介港交所（388），佢自己喺一個月前以每股231.8元入咗貨，劉小姐話：「炒佢有直通車概念。」正如黃敏碩所講：「直通車普遍都覺得今年唔會通。」孫柏文更謂：「資金自由行好似八萬五，唔講等於無咗。」
不過，劉小姐深信直通車一定開通，據孫柏文分析，較早前港交所炒上，係因大家憧憬資金自由行，兼政府入市。不過，孫柏文話：「同曾俊華傾過偈，如果冇咩變動，政府無計劃會再入。」
直通車今年難開通
其實，劉小姐都知道自己高追港交所，所以驚其他持有港交所嘅散戶冇耐性，會沽售手上股票，令港交所股價跌番落去，「我已經好高入喇！」黃敏碩亦覺得劉小姐買入價過高，面對港交所成交量縮減，恐無力支撐股價。
不過，孫柏文同黃敏碩一致認為，下星期美國一定減息，孫柏文話：「有五成機會減0.5厘。」港交所可從中受惠，建議劉小姐可在減息後再決定去留。
國壽利淡消息已反映
另外，劉小姐還買了國壽（2628），佢先喺52蚊買入，繼而喺43蚊溝淡，難免俾孫柏文揶揄：「摸頂喎，真係叻女！」但黃敏碩覺得利淡消息已經反映，而且國壽會推出多元化投資產品，可抵銷保單放緩情況，黃敏碩安慰劉小姐話：「市場氣氛如果轉好，佢重拾龍頭地位應該唔會太難。」
SOHO中國（410）
非一般內房股
何民田David早排以8.26元買入SOHO中國（410），睇好呢隻股可以升上10蚊。但David噚日就以9.45元掛出沽盤，最終賣唔到。黃敏碩好奇謂：「David睇10蚊，但就喺9.45元掛沽盤。」David解釋：「呢排個市大上大落，有的驚。」
黃敏碩認為，以SOHO過去走勢，目標價定於10蚊合理。佢話：「過去市場炒內房股，係講土地儲備有幾多，但自從發生碧桂園（2007）『零蚊』搶地，又有多項政策針對囤積土地後，市場睇法已經有改變。」另外，SOHO中國主要興建寫字樓，或在貴重地區發展精品房，貴精不貴多，與一般內房股有別，有其獨特性。
何文田David建議
買入價：$8.26
目標價：$10
止蝕價：$7.50
時間：$9.5之後再諗
專家回應：短期受宏調影響
中國重汽（3808）
蟹貨多難大升
Michael推介中國重汽（3808），原因係重汽噚日重拾升軌，如果係上市後入貨嘅投資者，𠵱家應該執唔少。Michael話重汽剛接到越南新訂單，有概念可炒。
孫柏文質疑：「咁究竟張訂單有幾大先？」Michael話張訂單只係賣2500架車，唔算大。不過，黃敏碩話：「越南訂單只係升幅嘅其中一個因素。」
他指，市場對重汽的零部件需求大，而且同類型股份唔算多，但對於Michael表示：「到價就走。」黃敏碩覺得策略過於保守，水位太少。不過，佢同孫柏文都認為，市場上有大量蟹貨，對重汽可以大升有所保留。
將軍澳Michael個案
買入價：無
目標價：$13
止蝕價：無
時間：1個月
專家回應：可持有招股價上限後減持
金榜集團（172）
食正市場空隙
日前有網友打電話嚟「哭股喪」，話買咗隻金榜集團（172）結果坐艇，噚日旺角Peter就推介呢隻股。Peter欣賞呢隻股業務夠獨特，「間公司𠵱家做嘅嘢，喺香港上市公司好少見，亦係大陸一個新興行業，簡單啲講，佢做『大耳窿』。」
黃敏碩亦認為金榜食正家吓市場空隙。孫柏文就問：「中央銀行要降低貸款增長，冇理由唔郁埋呢啲財務公司？」Peter認為：「對於商業銀行，中央可以做嘅嘢好少，唯一調高存款準備金，但財務公司冇呢樣嘢。」
Peter目標價睇1蚊，時限3個月，金榜噚日突然發威，飆升27%，收0.66元。
旺角Peter建議
建議買入價：現價
目標價：$1
止蝕價：$0.50
時間：3個月
專家回應：業務短期可配合政策
星期一嘉賓：東方匯理衍生產品董事李靄欣
每日收市後4:30pm
想搵名家教路，請登入以下網址
http://appledaily.atnext.com/jp/finance登記
成功參與節目者，有機會獲贈禮品
歡迎Phonein28698262
＊以webcam參與節目者，可額外獲贈KFC$100現金券
