模特兒問：「聽日影咩車？」我答：「Q7。」
模特兒再問：「咁我着得Cutie啲就得啦？」我答：「你好Cute，但架車一啲都唔Cute。」
終於好Cute嘅模特兒嚟到巨無霸Q7面前：「嘩，呢架車坐7個人？10個我都坐得落。」係，呢啲叫鬼佬晒士。
上車遊咗轉車河之後：「架車咁大隻起步都咁快嘅？」因為有副4.2V8偈襯番2,240kg車重，仲有Quattro四驅系統……
「乜Q系統話？貴唔貴㗎？」
「Quattro，車價差唔多90萬。」
模特兒衝口而出：「咁Q貴？」
除咗係身份象徵，仲有前中後排超豪配套，加埋可以硬闖山路縱橫公路嘅強橫性能，識貨而又Q得起者，一定覺得物有所值。
文：嘴嚼爺
攝影：陳偉強
Model：Joanne
食油巨無霸
揸開歌露拿、Echo仔、Kcar嘅朋友仔，請準備同我一齊嘩嘩聲憎人富貴因妒成恨，Q7平均耗油量7.35km/L！油價日日升，幾錢一公里自己計，總之呢個耗油量已經差唔多係波子911Turbo嘅兩倍，恐怖！
不過既然可以豪擲成球嘢買Q7，相信油費呢啲濕濕碎都唔係應計較嘅問題，需知道「我架車成兩蚊一公里，踩大啖啲油都唔夠膽。」呢類說話絕不會出自富有車迷口中。始終要推得郁一架車長過5米，闊約2米、車高約1.7米嘅巨無霸，仲隨時唔覺意要載7個人，呢350匹馬力唔慳得，呢啲錢更絕對唔慳得。
暗藏野性
係呀，同你啱啱識個女朋友一樣，外表斯斯文文，識落你就知佢唔好惹，暗藏霸道力量。Q7擁有強勁馬力，但唔係跑車，所以做到0-100km/h只需7.4秒其實已經有驚喜，若論爬山走爛路更係獨當一面。
外表出得大場面，越野性能卻非常強勁，Quattro四驅系統淡化車長同車重帶嚟嘅影響，簡單講句，即係你唔會估到咁大架車原來可以咁靈活咁易睇位咁易揸。而且Q7具備改良自A6/A8嘅AdaptiveAirSuspension系統，5種預設高度，車身最盡可升高60mm（時速不能超過40km/h）或降低35mm，有需要時，更可選擇只降低尾軸高度，方便搬運大型物件進出車尾。
超豪SUV
物有所值！呢句我真心㗎！全車「骨子」皮椅皮櫳點會冇，巨無霸車廂空間何止逼得入10個Joanne。前中排寬敞理所當然，難得係最後排兩座位、中排3座位都比一般房車鬆動得多。後排設有獨立冷氣風口，中排更可獨立調校風速兼具左右餐枱，舒適程度比得上班明星坐嗰啲傳統七人車，因為呢架係Audi打正旗號首部SUV，中後排座椅可以選擇性地放平，增加載物空間。
另外車頂三份天窗亦係值得欣賞之處，覆蓋面積製造出擬似天幕式車頂，7個人齊齊曬月光都仲得，而且前段部份更可以完全打開，凉風陽光都可以上晒車，夜晚仲可以上山睇星星㖭。
a.全黑錶板加上電鍍銀邊，視覺上相當穩重有氣勢，中間位置更可清楚顯示行車狀況。
b.呢個唔係前排中控台，而係中排坐位獨立冷氣調校按鈕連點煙器，但係?得呢架車應該好好享受駕駛樂趣，我有錢都唔會請司機。
c.駕駛席走高格調路線，沒有浮誇裝飾但設備齊全，尤其冷氣、定速巡航、音響等按鈕足足一大堆，有排先玩得熟。
d.香港唔畀改裝茶色玻璃，怕曬怕曝光嘅，大可拉起窗網。
e.18吋軨唔算太大，而且懸掛可調校，令車身離地冇咁高，上落都好容易。
f.尾門一開就開到好高，好彩有個貼心關門掣，一按自動降低，唔使擒高擒低方便好多。
g.中排3座位中間乘客會坐得冇咁舒服，不過有幾可咁齊人上晒車?
AudiQ7規格
引擎：4,163c.c.V8DOHC
馬力：350hp/6,800rpm
扭力：440Nm/3,500rpm
傳動：6前速Tiptronic半自動波，恒式4驅
車輛提供：合廸汽車（25281862）
供款幫你計
首期：$89,900
利率：6%
每月供款：
約$20,900（48個月）
＊以上數據僅供參考
即場砌Q7畀你睇
你會唔會想知屋企部LCD電視點嚟？又想唔想睇你供緊層樓建築過程？我都係想睇栢芝同霆鋒個仔Lucas嘅製造過程多啲。不過，原來呢段Q7製造過程又幾好睇喎，鬼佬人手加機械臂裝嵌到噴油全程曝光，精密複雜到暈，睇完我差啲懷疑架車曉變機械人。
http://www.youtube.com/watch?v=qKahvzL7GiY
Audi送車𠱁碧咸
06年4月，當時仲係踢緊皇馬嘅碧咸，被人偷咗架BMWX5，據講當時係球隊贊助商之一嘅Audi，即刻就送番部Q7𠱁佢。而因為車廠係球隊贊助商，所以傳聞當時所有球員都要揸Audi返練習場。不過，聽講阿萬人迷有成二十幾部名車，唔知有冇帶埋呢部Q7去洛杉磯呢？
率先撐iPhone
網上消息，喺美國嘅Audi車系A5、A6、A8同Q7已經率先採用配備iPhone介面，即係駁你部iPhone去部車嘅MMi系統，中控台屏幕就會顯示電話訊號強度、正播放歌曲等資料。係呀，你部iPhone連UpgradeFirmware都唔得，有新Audi你都用唔着！
