世衞的研究發現通宵工作致癌，護士更是高危職業。Betty在公立醫院任職護士，36歲時證實患上子宮內膜癌，須割除子宮，無法生育。她相信患癌與持續日夜顛倒的生活有關，「護士唔係鐵人，如果我繼續返夜更，癌症復發機會都會高啲。」
黑暗環境睡覺
今年44歲的Betty說，病房護士屬輪班制，平均每五至七天，就須一晚通宵工作，「返完AM（上午至下午），夜晚九點半又要返病房，同啲病人熟晒。中間個腦仲諗住做嘢，根本瞓唔到。返夜好多嘢做，試過一晚要做三個急救，落落吓chart（寫病歷表）都會瞓着。」
日夜顛倒的生活持續十多年，煙酒不沾的Betty七年前陰道突然大量出血，證實患上二期子宮內膜癌，必須割除整個子宮及卵巢保命，無法履行生育計劃。現時她任職朝九晚五的後勤工作，為病房準備醫療器材。她促請醫管局增加護士人手，「人有極限，希望同事唔使返完早即刻返夜。」
香港精神健康促進會主席兼精神科專科醫生陳仲謀表示，需要輪班的僱員最好選擇長期通宵更，以免「一早一夜」而搞亂生理時鐘，每次通宵工作後更要立即休息，並盡可能在完全黑暗的環境睡覺，讓身體分泌足夠激素。
本報記者
通宵工作者回應
《護士壓力大》
前華員會護士分會主席邵桂鳳：「我呢間醫院七年內有幾個護士因癌症離世，仲有更加多做緊治療。𠵱家輪住一個星期返一晚通宵，有啲病房人手唔夠，好大壓力。」
《定期去檢查》
楊思琦：「做我哋呢行都冇辦法，惟有定期去做身體檢查，平時唔使開工嘅話盡量休息多啲，做多啲運動，仲有就係唔好食咁多煎炸嘢，食多啲有營養嘅食物，或者係維他命丸。」
《得閒做運動》
陳豪：「長期通宵工作，對身體任何一部份都係唔好，所以工作之餘要更加注意飲食健康，唔好食咁多肥膩嘢，盡量食多啲纖維食物，我一向都好注重健康，得閒就做運動。」
《患癌同事多》
消防處救護員會主席屈奇安：「過去幾年有唔少救護同事發現患胃、肺、喉等各類癌症，好多都係只係得30幾、40歲；我哋通宵更忙到無休息同食飯時間，辛苦過返日間。」
《個口都臭啲》
市區的士司機聯委會主席郭志標：「我做過十幾年夜更的士，好多同行身體唔好，個口都臭啲，有啲仲有肝癌。返夜身子弱咗好多，瞓極都唔夠，長時間手軟腳軟。」
