港台噚日喺跑馬地馬場舉辦「第三十屆十大中文金曲」揭幕記者會，今年港台嘅主題係「Wearefamily」，宣揚和諧家庭，於是班歌星就玩家庭角色互選，結果李克勤以最高票數被封做「家公」，陳奕迅做「家婆」，古巨基係「大少」，楊千嬅做「家嫂」，容祖兒係家姐，仲有「家丁」係關楚耀，千嬅抱住BB公仔時笑到見牙唔見眼，好鬼開心。
Twins被問到揀邊個做大少，鍾欣桐問現場邊個最有錢，周國豐即寸佢緋聞情人話：「有錢咪Juno（麥浚龍）囉，你迫我講㗎！」蔡卓妍即幫手解圍話：「我哋選克勤㗎！」
噚日班歌手見面都好友善，未有爭獎氣氛出現，陳奕迅仲同勁敵古巨基雞啄唔斷。問到有子萬事足嘅克勤係咪唔爭獎？佢話：「唔係，我未去到劉德華咁，我好緊張㗎，但唔會夾硬嚟。」
朱培慶贈興
另外，大會總監馮偉棠宣佈今年「金曲三十」要搞大佢，所以港台喺1月19日嘅頒獎禮會有好多表演活動，於是要預早喺1月13日先喺港台頒發部份獎項，變相搞兩日頒獎禮，佢哋仲邀請因艷女CoCo而落台嘅廣播處前處長朱培慶出席欣賞。
