《號外》雜誌又30歲？又係陳冠中、鄧小宇訪問？不必了吧！冇理由31歲仲扮30歲，除非問米專訪丘世文則作別論，後來才知道他們竟然請動一向正路的著名社會學家呂大樂教授出手編輯，佢話自己受唔住誘惑，自動獻身，於是乎便出了豪華版《號外三十》。這「大書」書盒有十款可揀，全是城中型人巨星，如劉德華、張國榮、梁朝偉、劉天蘭……型就型到爆，但6百大元就算九折都貴到無倫，冇錢肯定冇得扮有Taste。本來想到自命中產的《號外》精神，又大又重又扮嘢，就想到拒買，但一查目錄原來全是老香港舊賬，懷他的舊懷到50年代，訪問史上最出色鹹報《今夜報》，扮君子卻不忘爛撻撻，再來個Smart-assism（屎弗鬼主義），當年拒絕了，做唔成「知識分子」，原來還有另一次惡補機會。一書分三冊，《人物》篇起完一個底又一個，劉德華、黃韻詩、張五常、梁淑怡……《城市》篇集30年香港大混賬，自命時髦又不忘處處提醒你非常市井，抵死入肉瘋狂吹谷；《內部傳閱》顧名思義，是「號外人」確認身份的象徵，誰是「她」、「他」、「他們」，你唔識就「好打有限」，甚麼《號外》美學、《號外》態度，雖然唔知就嚇死，知就笑死。為了唔想嚇死，我選擇笑死。
記者：馮敏兒
